Xalqaro terroristik tashkilotlarga aloqadorligi uchun qidiruvda bo‘lgan I.O. ismli fuqaro Davlat xavfsizlik xizmati xodimlari tomonidan xorijdan O‘zbekistonga olib kelindi. Bu haqda idora matbuot xizmatiga tayanib, O‘zA xabar berdi.
Ma’lumotlarga ko‘ra, I.O. 2014-yilning fevral oyida mavsumiy ishlash maqsadida Rossiyaga borgan va internet tarmog‘i orqali xalqaro terroristik tashkilotlar a’zolari bilan aloqaga kirishgan. Natijada ularning ta’siri ostida I.O. yashash manziliga qaytib kelib, ikki nafar farzandini ota-onasiga qoldirgan hamda rafiqasi bilan birga 2015-yilning mart oyida Ukraina orqali dastlab Turkiyaga, so‘ngra Suriya hududiga o‘tib, “Islom davlati” xalqaro terroristik tashkiloti safiga qo‘shilgan.
Shu tariqa u 2015—2021-yillar davomida Suriya va Iroq davlatlaridagi terroristik tashkilotlar safida jangovar harakatlarda qatnashgan. Shuningdek, u 2021-yilning sentabr oyida Markaziy Osiyo davlatlarining birida amalga oshirilishi kerak bo‘lgan qo‘poruvchilik harakatida ishtirok etishi lozim bo‘lgan.
Hozirda I.O.ga nisbatan qo‘zg‘atilgan jinoyat ishi doirasida tergov harakatlari olib borilmoqda.
Avvalroq O‘zbekistonda qidiruvda bo‘lgan shaxs Rossiyada qo‘lga olingani, Rossiyada giyohvand moddalar savdosi bilan shug‘ullangan o‘zbekistonlik aka-uka 6 yilga qamalgani, O‘zbekistonda firibgarlik sodir etgani uchun xalqaro qidiruvda bo‘lgan ikki fuqaro Janubiy Koreyadan ekstraditsiya qilingani to‘g‘risida xabar berilgandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)