O‘zbekistonda bo‘lib turish vizasi muddati tugayotgan Afg‘oniston fuqarolari o‘z yurtiga qaytarib yuborilmaydi, chunki mamlakatlar o‘rtasidagi chegara jismoniy shaxslar uchun yopiq. Bu haqda “Gazeta.uz”ga O‘zbekiston Ichki ishlar vazirligi vakili ma’lum qildi.
Avvalroq “Markaziy Osiyoda inson huquqlari” assotsiatsiyasi (AHRCA), inson huquqlari bo‘yicha xalqaro hamkorlik (IPHR) va Norvegiya Xelsinki qo‘mitasi (NHC) O‘zbekistonda bo‘lib turgan 70 dan ortiq Afg‘oniston fuqarosi o‘z yurtiga deportatsiya qilinishi mumkinligini ma’lum qilgandi. Huquq himoyachilarining ma’lumotlariga ko‘ra, 2021-yil avgustining o‘rtasida “Tolibon” harakati hokimiyat tepasiga kelgach, ular uch oyga O‘zbekiston vizasini olgan va mamlakatga taklifnoma bo‘yicha emas, majburan kelgani uchun hozirda vizalarning uzaytirilmasligidan xavotirda.
“Hech qanday kamsitish holatlari yo‘q. Hozirda bunday masala turgani yo‘q, chunki Afg‘oniston bilan chegaramiz (jismoniy shaxslar uchun — tahr.) yopiq” — degan IIV vakili.
Vazirlik ma’lumotlariga ko‘ra, hozirda O‘zbekiston hududida 13 658 nafar Afg‘oniston fuqarosi bo‘lib turibdi. Shulardan 13 032 nafari vaqtincha yashayotgan bo‘lsa, ulardan ko‘plari O‘zbekistonga biznes masalalari bo‘yicha hamda qarindoshlarini ko‘rishga kelgan.
IIV vakilining ma’lum qilishicha, Afg‘oniston fuqarolarining vizalarini uzaytirish uchun O‘zbekistondagi vaqtinchalik yashash joyi bo‘yicha migratsiya bo‘limlariga murojaat qilish lozim.
“Yashash maydonining egasi ruxsati bilan ular ro‘yxatga olinadi. O‘zbekiston qonunlarini va respublikada bo‘lib turish qoidalarini buzmayotgan xorijiy fuqarolarga vizalar uzaytiriladi”, — deya qo‘shimcha qilgan IIV vakili.
Avgust oyi o‘rtalarida toliblar mamlakatda hokimiyatni qo‘lga olgach, 150 nafar afg‘on afg‘on-o‘zbek chegarasini kesib o‘tdi. Keyinroq ularning barchasi yangi afg‘on rasmiylaridan xavfsizlik bo‘yicha kafolatlar ostida o‘z yurtiga qaytarildi.
Izoh (0)