Netflix tarixidagi eng mashhur loyiha bo‘lgan “Kalmar o‘yini” kompaniyaga 900 million dollar daromad keltirgan. Ammo shunga qaramay serial rejissoriga siz-u biz o‘ylaganchalik ko‘p gonorar to‘lanmagan.
Rejissor Xvan Don-xek The Guardian nashriga bergan intervyusida serial unga qancha daromad keltirgani haqida ma’lumot bergan. U serial ortidan haddan tashqari ko‘p mablag‘ga ega bo‘lgani haqidagi mish-mishlarni yolg‘on ekanini aytib o‘tgan. “Unchalik boy emasman. Topganim o‘zimga yetadi. Qora qozon qaynab turibdi. Netflix menga bonus bermadi, menga shartnomaning dastlabki shartlariga muvofiq pul to‘lashdi”, — deydi u
Rejissor hazillashib serialdagi bosh qahramon yutganidan keyin qo‘lga kiritgan mablag‘dan ham kamroq pul topganini ta’kidlagan.
Ma’lumot uchun, sujetga ko‘ra Son Ki Xun barcha sinovlardan o‘tib, g‘olib bo‘ladi va 38 million dollardan ko‘proq pulga ega bo‘ladi. Xvan Don-xek, shuningdek, kuchli stress sabab suratga olish maydonchasida oltita tishini yo‘qotganini ham ma’lum qilgan.
Ekran yuzini ko‘rganidan keyin atigi 17 kun ichida “Kalmar o‘yini”ni 111 million akkaunt egasi tomosha qilgan. Kinokartina jiddiy moliyaviy muammolarni boshdan kechirayotgan va omon qolish uchun o‘yinda ishtirok etadigan 456 nafar qahramon haqida hikoya qiladi.
Izoh (0)