Qashqadaryo viloyatining Qamashi tumanida sodir bo‘lgan yo‘l-transport hodisasi oqibatida ikki nafar haydovchi va bir nafar yo‘lovchi halok bo‘ldi, deb xabar beradi IIV YHXBB axborot xizmati.
Ma’lum qilinishicha, 17-oktabr kuni soat 15:40 larda Qamashi tumani, Yortepa qishlog‘i hududidan o‘tuvchi M-39 Toshkent—Termiz avtomobil yo‘lining 1223-kilometrida 44 yoshli fuqaro O.E. Nexia rusumli avtomobilni boshqarayotib, qarama-qarshi yo‘nalishga chiqib ketgan. Natijada avtomobil 41 yoshli Sh.T. boshqaruvida bo‘lgan Damas bilan to‘qnashuv sodir etgan.
Avariya oqibatida mashinalarning ikkala haydovchisi va Damas yo‘lovchisi D.E. og‘ir tan jarohatlari bilan voqea joyida vafot etgan. Shuningdek, avtomobilda bo‘lgan yana bir yo‘lovchi tan jarohat olib, shifoxonaga yotqizilgan.
Mazkur YTH yuzasidan Qamashi tuman IIO FMB huzuridagi Tergov bo‘limi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 3-qismi “a” bandi bilan jinoyat ishi qo‘zg‘atilib, dastlabki tergov harakatlari olib borilmoqda.
Avvalroq Qashqadaryoda Nexia va Captiva to‘qnashuvi oqibatida ikki haydovchi vafot etgani, Qashqadaryoda Damas va YPX avtomobili to‘qnashgani, Qarshida sodir bo‘lgan YTHda 24 yoshli IIB xodimi halok bo‘lgani, Qashqadaryoda piyoda o‘limiga sababchi bo‘lgan Nexia haydovchisi voqea joyidan yashiringani to‘g‘risida xabar berilgandi.
Izoh (0)