Korrupsiyaga qarshi kurashish agentligi “Korrupsiya darajasini reyting baholash metodikasi asosida davlat organlarida, shu jumladan, hududlarda korrupsiya darajasini reyting baholash tizimini joriy etish to‘g‘risida”gi Vazirlar Mahkamasi qarori loyihasini muhokamaga qo‘ydi.
Qarorga ko‘ra, keng aholi qatlami, tadbirkorlik subyektlari, shu jumladan, O‘zbekistonda faoliyat yuritayotgan xorijiy investitsiyalar ishtirokidagi korxonalar, mahalliy va xalqaro ekspertlar o‘rtasida so‘rovnomalar o‘tkaziladi. So‘rovnomalar natijalarini tahlil qilish asosida davlat organlari va hududlarda korrupsiyaning tarqalganlik darajasi aniqlanadi.
Baholash natijalari asosida:
- korrupsiyaning tarqalganlik darajasi reytingi, shu jumladan, korrupsiya xavfi yuqori bo‘lgan davlat organlari va hududlar ro‘yxati shakllantiriladi;
- baholash natijalari har yili 1-dekabrga qadar Oliy Majlisi palatalari, Prezident Administratsiyasi, Vazirlar Mahkamasi, Korrupsiyaga qarshi kurashish milliy kengashiga kiritiladi;
- baholash natijalari ommaviy axborot vositalarida, davlat va xo‘jalik boshqaruvi organlari, mahalliy ijro etuvchi hokimiyat organlarining rasmiy veb-saytlarida e’lon qilinadi.
Bundan tashqari, agentlik qonunchilikni takomillashtirish, huquqni qo‘llash amaliyotini birxillashtirish, xodimlarning mehnat sharoitlarini yaxshilash, nazorat va javobgarlikni kuchaytirishga doir takliflar ishlab chiqadi.
Moliya vazirligiga Korrupsiyaga qarshi kurashish agentligi buyurtmanomalariga asosan so‘rovnomalarni o‘tkazish va e’lon qilish uchun zarur bo‘lgan mablag‘larni davlat budjeti xarajatlari parametrlarida nazarda tutgan holda ajratish vazifasi yuklangan.
Avvalroq “Normativ-huquqiy hujjatlar va ularning loyihalarini korrupsiyaga qarshi ekspertizadan o‘tkazishni yanada takomillashtirish chora tadbirlari to‘g‘risida”gi Prezident qarori qabul qilingani to‘g‘risida xabar berilgandi. Qarorga ko‘ra, normativ-huquqiy hujjatlarni korrupsiyaga qarshi ekspertizadan o‘tkazish tartibi joriy etilgan.
Izoh (0)