Toshkentlik ko‘cha rassomi Inkuzart kuni kecha O‘zbekiston prezidenti sayloviga hamda Janubiy Koreyaning “Kalmar o‘yini” serialiga ishora qiluvchi graffiti chizdi. Yangi graffiti haqidagi videoxabarida rassom: “Kelajak uchun ovoz bering”, deb chorlov qoldirgan.
Rassom o‘zining ijod namunasini Muqimiy va Chilonzor ko‘chalari chorrahasidagi devorlardan biriga chizgan. Inkuzart’ning eng mashhur ishlaridan biri — Qodiriy, Cho‘lpon va Fitrat portretlari ham aynan shu chorrahadagi ko‘p qavatli uylardan birining devoriga chizilgan.
O‘zbekistonda 24-oktabr kuni soat 08:00 dan prezident saylovida ovoz berish boshlandi. Saylov uchastkalari soat 20:00 gacha ochiq bo‘ladi. Davlat rahbari lavozimi uchun besh nomzod — “Adolat” sotsial-demokratik partiyasidan Bahrom Abduhalimov, O‘zLiDePdan Shavkat Mirziyoyev, Ekologik partiyadan Narzullo Oblomurodov, “Milliy tiklanish” demokratik partiyasidan Alisher Qodirov va Xalq demokratik partiyasidan Maqsuda Vorisova kurash olib boradi.
Izoh (0)