Respublika Gidrometeorologiya markazi 21—22-oktabrda O‘zbekiston hududiga Kaspiy dengizi orqali Kavkaz hududlari ustida shakllangan nam va sovuq havo massalari kirib kelib, tog‘ oldi va tog‘li hududlarda yomg‘ir, qor yog‘ishini ma’lum qilgandi. 22-oktabr kuni ijtimoiy tarmoqlarda Jizzaxning Zomin tumani tog‘li hududlarida qor yog‘gani aks etgan foto va videolar paydo bo‘la boshladi.
Gidrometeorologik ilmiy tahlillar, ob-havo prognozlari, tadqiqotlar, ma’ruzalar kanali Zomin tumani dengiz sathidan 800-900 metrdan yuqoridagi manzara bilan bo‘lishdi. Unda daraxtlar va mashinalar ham qalin qor bilan qoplanganini ko‘rish mumkin.
Tarmoqda tarqalgan videoda “Zomin” sihatgohi hududi qorga burkangani aks etgan. Shuningdek, Toshkentning Bo‘stonliq tumani ham qor bilan qoplangani aytilmoqda.
21-oktabr kuni kechasi Qamchiq dovonida ham qor yog‘gandi. Shu sababli YHXBB barcha haydovchilarni yo‘llarda oraliq masofani saqlab, qoidalarga rioya qilishga, dovon yo‘lidan harakatlanib o‘tuvchilardan esa o‘ta ehtiyotkor bo‘lishga chaqirdi.
Izoh (0)