21-oktabr kuni Oliy Majlis Senatining yigirmanchi yalpi majlisida “O‘zbekiston Respublikasining Soliq kodeksiga aholini asosiy turdagi oziq-ovqat mahsulotlari bilan kafolatli ta’minlashga qaratilgan qo‘shimcha kiritish to‘g‘risida”gi qonun ko‘rib chiqildi. Bu haqda parlament yuqori palatasi matbuot xizmati xabar berdi.
Qonun bilan respublikada go‘sht mahsulotlari va asosiy iste’mol mahsuloti bo‘lmish kartoshkaga bo‘lgan talab va narxlar barqarorligini ta’minlash orqali aholi daromadlarini oshirish maqsadida Soliq kodeksiga qo‘shimcha kiritilmoqda.
Xususan, Soliq kodeksining 483-moddasiga 2021-yil 10-oktabrdan 2021-yil 31-dekabrga qadar bo‘lgan davrda go‘sht (mol, qo‘y, tovuq), tirik hayvonlar (qoramol va parranda) va ularni so‘yish mahsulotlari, kartoshka hamda muzlatilgan baliqni O‘zbekiston hududiga olib kirish, shuningdek, ularni realizatsiya qilish bo‘yicha aylanmalar qo‘shilgan qiymat solig‘idan ozod qilish bo‘yicha qo‘shimcha norma kiritilyapti.
Eslatib o‘tamiz, mazkur hujjat 19-oktabr kuni Oliy Majlis Qonunchilik palatasi tomonidan qabul qilingan edi.
“Gazeta.uz”ning Budjet va iqtisodiy islohotlar masalalari qo‘mitasi raisi Erkin Gadoyevga tayanib yozishicha, qonunning qabul qilinishi aholini asosiy turdagi oziq-ovqat mahsulotlari bilan kafolatli ta’minlash, narxlarni barqarorlashtirish va aholi daromadlarini oshirishga xizmat qiladi.
Uning so‘zlariga ko‘ra, aholining chorvachilik mahsulotlariga bo‘lgan ehtiyojini qondirish uchun tibbiyot normalarga ko‘ra, 1,5 million tonna go‘sht, ya’ni har bir kishi uchun yiliga 42,8 kilogramm go‘sht talab etiladi. 2021-yilda 1,4 million tonna go‘sht ishlab chiqarish rejalashtirilgan, bu 2020-yilga nisbatan 4 foizga ko‘p.
“Bu miqdor aholi iste’moli talabining 93 foiziga teng. Demak ehtiyojning qolgan qismi import go‘sht hisobidan qoplanishi kerak”, — deydi u.
Erkin Gadoyev import go‘shtning o‘rtacha narxi 43,2 ming so‘mni tashkil etishini, shundan 5700 so‘m QQSga to‘g‘ri kelishini ma’lum qilgan. Ichki bozorda esa 18-sentabr holatiga go‘shtning o‘rtacha narzi 62 ming so‘mga teng, bu esa 2020-yilga nisbatan 13 foizga (55 ming so‘m) qimmatlaganini anglatadi.
Eslatib o‘tamiz, 2021-yilning mayida Prezident Shavkat Mirziyoyev go‘sht va o‘simlik yog‘ining jahon bozoridagi narxlari 1 yildan buyon to‘xtovsiz o‘sayotgani barcha rahbarlarni zarur chora-tadbirlarni ko‘rishga undashi kerakligini ta’kidlagandi.
Bundan avval Markaziy bank o‘zbekistonliklarni ayrim asosiy oziq-ovqat narxlari keskin oshishidan ogohlantirgani, Toshkentda ayrim mahsulotlar Yevropa poytaxtlaridan ham qimmatroq ekani aniqlangani hamda Oziq-ovqat sanoati uyushmasi raisi O‘zbekistonda o‘simlik yog‘i narxlarining oshishiga izoh bergani haqida xabar berilgandi.
Izoh (0)