Volkswagen kompaniyasining birinchi elektrokrossoveri ID.4 Ginnesning rekordlar kitobidan joy oldi. Ta’kidlanishicha, ID.4 bitta mamlakat hududi bo‘ylab maksimal masofani bosib o‘tgan elektromobilga aylangan. Rekord o‘rnatish uchun AQSh tanlangan bo‘lib, avtomobil 48 ta shtat va Volkswagen’ning 628 ta dilerlik markazini bosib o‘tib, 56,3 ming kilometrga yaqin yo‘l yurgan. Butun sayohat uchun qariyb uch oy vaqt sarflangan, deb xabar beradi Motor.

Foto: Volkswagen

Volkswagen ID.4 ni uzoq masofaga tez harakatlanish bo‘yicha mutaxassis Reyner Sitlou boshqargan, suratkash Derek Kollins esa unga hamrohlik qilgan. 97 kun davom etgan safarda ular tarkibiga 650 ta stansiya va 2800 alohida terminallar kiruvchi Electrify America quvvatlantirish stansiyalariga 208 marta to‘xtashni amalga oshirgan.

Foto: Volkswagen

Foto: Volkswagen

Rekord o‘rnatgan Volkswagen elektrokarining texnik tavsifi oshkor etilmagan, ammo safar uchun sig‘imi 77 kilovatt/soat bo‘lgan batareyadan foydalanilgan bo‘lishi mumkin. U krossoverga bir marta quvvatlanish orqali WLTP sikli bo‘yicha 522 kilometr yo‘l bosish imkoniyatini taqdim etadi. Shuningdek, ekspress-quvvatlantirgich yordamida 320 kilometrga yetadigan quvvatni yarim soatda to‘ldirish mumkin.

Foto: Volkswagen

Foto: Volkswagen

ID.4 ning sayohati onlayn kuzatib borilgan, uning harakat nuqtasi har 15 daqiqada yangilab borilgan. Oradan qariyb uch oy o‘tgach, elektromobil Virjiniya shtatidagi Xerndon shahriga qaytgan bu yerda unga Ginnesning rekordlar kitobi vakillari tomonidan sertifikat topshirilgan.

Foto: Volkswagen

Avvalroq vodorodda harakatlanuvchi Toyota Mirai uzoq masofaga yurish bo‘yicha yangi rekord o‘rnatgani to‘g‘risida xabar berilgandi.