O‘zbekiston Respublikasi Prezidentining 2021-yil 15-iyuldagi “Respublikada o‘simliklar karantini va himoyasi tizimini tubdan takomillashtirish chora-tadbirlari to‘g‘risida”gi 6262-sonli farmoniga asosan, o‘simliklarni himoya qilish sohasini rivojlantirish va qo‘llab-quvvatlash maqsadida, sohaga oid mavjud muammolarning ilmiy yechimini ta’minlash hamda yangi innovatsion ishlanmalarni amaliyotga joriy qilish bo‘yicha 2021-yil 20-oktabr kuni O‘zbekiston Respublikasi Innovatsion rivojlanish vazirligi va “Agrobank” aksiyadorlik tijorat banki o‘rtasida hamkorlik memorandumi imzolandi.

Mazkur tadbir munosabati bilan ommaviy axborot vositalari vakillari ishtirokida matbuot anjumani ham o‘tkazildi. Anjumanda vazirlik va bank mas’ul xodimlari, jurnalistlar, blogerlar hamda soha mutaxassislari, olimlar ishtirok etishdi.

Memorandum doirasida “Agrobank” ATB hamda O‘zbekiston Respublikasi Innovatsion rivojlanish vazirligi O‘simliklarni himoya qilish ilmiy-tadqiqot instituti va sohadagi ilmiy izlanuvchilarning ilmiy faoliyatini qo‘llab-quvvatlash, yangi innovatsion ishlanmalarni amaliyotga joriy etish, o‘simliklarni himoya qilish yo‘nalishida zamonaviy laboratoriyalarni tashkil etish, joriy ta’mirlash ishlariga qaratilgan loyihalarga grant mablag‘ini ajratishda o‘zaro hamkorlik faoliyatini amalga oshiradi va hamkorlikda yangi istiqbolli ilmiy-innovatsion loyihalarni ishlab chiqish maqsadida o‘zaro hamkorlik qiladi.

Ilmiy-tadqiqot ishlariga oid loyihalarni shakllantirishda quyidagi jihatlar inobatga olinadi:

  • o‘simliklarni himoya qilish ilmiy-tadqiqot instituti va sohadagi izlanuvchilarning ilmiy faoliyatini qo‘llab-quvvatlash uchun yangi innovatsion tadqiqotlarni amaliyotga joriy etishga qaratilgan, ilmiy loyihalarni shakllantirishda zarur bo‘lgan yangi ishlanmalarni yaratish, yangi g‘oyalarni rag‘batlantirish;
  • o‘simliklarni himoya qilish va qishloq xo‘jaligida yangi konstruksiyalar, materiallar, usullar, xizmatlarni yaratishga yoki mavjudlarini takomillashtirishga xizmat qilish;
  • yaratiladigan ishlanmaning fan va texnologiyalarni rivojlantirishning ustuvor yo‘nalishlariga mos bo‘lishi;
  • respublika hududlarida sohaga oid aniq muammolarni ilmiy asosda hal etishga qaratilganligi;
  • loyiha natijasida yakuniy mahsulotni (yangi ishlanmani) yaratilishi asoslanganligi;
  • ishlanmaning raqobatbardoshliligi;
  • loyihaning natijadorligi (mahsulot yoki takomillashtirilgan texnologiya);
  • tanlovlar asosida moliyalashtirilgan loyihalar doirasida zamonaviy laboratoriya uskunalari hamda tadqiqot jarayonlari uchun bo‘lgan zamonaviy texnik vositalari bilan ta’minlashda o‘zaro hamkorlik qilish;
  • hamkorlikdagi ilmiy-tadqiqot ishlari yo‘nalishlari bo‘yicha yangi ilmiy ishlanmalar va texnologiyalarni respublika iqtisodiyot tarmoqlariga joriy etish bo‘yicha takliflarni ishlab chiqish;
  • Innovatsion rivojlanish vazirligi tomonidan moliyalashtirishga tavsiya etilgan ilmiy loyihalar (portfel)ni moliyalashtirish hamda O‘zbekiston Respublikasi Prezidentining 2021-yil 15-iyuldagi PF 6262-son farmoni talablarini bajarish;
  • tadbirlarni OAVlar orqali yoritilishini ta’minlash vazifalarini amalga oshiradi.

Tadbir yakunida O‘zbekiston Respublikasi Innovatsion rivojlanish vazirligi va “Agrobank” ATB o‘rtasida hamkorlik memorandumi imzolandi. Ommaviy axborot vositalari vakillari qiziqtirgan savollariga batafsil javob olishdi.

Reklama huquqi asosida.