Senatning navbatdagi yalpi majlisida Milliy gvardiya qo‘mondoni, general-mayor Rustam Jo‘rayev mehribonlik uylari va bolalar shaharchalari faoliyati to‘g‘risida axborot berdi. Bu haqda “Gazeta.uz” xabar berdi.
Rustam Jo‘rayevning so‘zlariga ko‘ra, rivojlangan davlatlar amaliyotida internat tipdagi muassasalar faoliyati ancha yillar oldin butunlay tugatilgan.
“Davlat va mas’ul tashkilotlar tomonidan yetim bolalarni oilaviy bolalar uylariga joylashtirish hamda juda qisqa muddatlarda ularga yangi oila topish choralari ko‘riladi. Bu tizim bitiruvchilarning keyingi shaxsiy, oilaviy hayotida va mehnat faoliyatida yuzaga kelishi mumkin bo‘lgan turli muammolar borasida tutingan ota-onalardan yaqindan yordam so‘rash, maslahatlar olish bilan birga, o‘rtalaridagi oilaviy munosabatlarni umrining oxirigacha saqlab qolish imkoniyatiga ega bo‘ladi. Shuningdek, oiladagi an’analar va urf-odatlarning davom etishiga zamin yaratiladi”, — dedi Milliy gvardiya qo‘mondoni.
Ta’kidlanishicha, o‘rganishlar davrida bolani farzandlikka olish istagida bo‘lgan ota-onalar juda ko‘pligi aniqlangan.
“Jumladan, respublikada faoliyat yuritayotgan 13 ta bolalar uylarida jami 504 nafar bola tarbiyalanayotgan bo‘lsa, ularni farzandlikka olish uchun hozirgi kunda navbatda 5792 nafar fuqaro turganligini ko‘rishimiz mumkin”, — dedi u.
U, shuningdek, bola asrab olishdagi muammolarga ham to‘xtalib o‘tdi.
“Fuqarolarni yillar davomida farzandlikka oluvchilar ro‘yxatida navbatda turishlar, ular tomonidan qonuniy hujjatlar rasmiylashtirish jarayonini chetlab o‘tib, noqonuniy yo‘llar bilan bola sotib olish darajasiga olib bormoqda”, — dedi Rustam Jo‘rayev.
Ta’kidlanishicha, 2017−2021-yillar mobaynida bola savdosi bo‘yicha 206 ta jinoiy holatlar aniqlangan.
Qo‘mondonning so‘zlariga ko‘ra, “Zo‘rTV” telekanalida hamkorlikdagi “Farzandim jigarbandim” ko‘rsatuvi efirga uzatilgach, fuqarolarning murojaatlari keskin oshgan.
“Milliy gvardiya markaziy devonida call center tashkil etishga majbur bo‘ldik. Hozirda bolani farzandlikka olish masalasida kuniga o‘rtacha 53 tadan ortiq murojaatlar bo‘lmoqda. 20 kun ichida jami 1057 nafar fuqaro murojaat qildi. Ularga maslahatlar berib, to‘g‘ri-to‘g‘ri muassasalar bilan bog‘layapmiz va nazoratga olyapmiz”, — dedi u.
Hozirgi kunda mehribonlik.uz sayti yaratilgani va yaqin kunlarda test rejimida ish boshlashi ma’lum qilindi.
Eslatib o‘tamiz, Prezident 9-avgustdagi qarori bilan mehribonlik uylari (16 ta, 1 541 nafar bola), bolalar shaharchalari (4 ta, 236 nafar bola), oilaviy bolalar uylari (5 ta, 46 nafar bola) va Sog‘liqni saqlash vazirligi tizimining bolalar uylari (13 ta, 506 nafar bola) Milliy gvardiyaga biriktirilgan edi.
Izoh (0)