Apple kompaniyasi 18-oktabr kuni yangi gadjetlariga bag‘ishlangan kuzgi ikkinchi taqdimotini o‘tkazdi. Unda uchinchi avlod simsiz AirPods naushniklari, yangi MacBook Pro noutbugi va protsessorlari taqdim etildi, deb xabar beradi “Korrespondent.net”.

Foto: Apple

AirPods 3

Akkumulyator yordamida ishlaydigan naushniklarning avtonomligi 6 soatga qadar yetkazilgan. Ixtirochilarning va’da qilishicha, ushbu naushniklar futlyari yordamida quvvatlantirib borilsa, uning yordamida 30 soatgacha musiqa tinglash mumkin. Narxi — 179 dollar. Shu bilan birga, eski AirPods’larni oldingidek xarid qilish mumkin bo‘ladi.

MacBook Pro

Noutbuk displeyining hoshiya qismi 3,5 millimetrga qadar qisqargan, bloki xuddi iPhone smartfonlaridagi kabi “qosh” qismiga joylashtirilgan. HDMI, Thunderbolt’li Type-C portlarining qaytarilishi, SD-karta uchun slot va MagSafe kutilmagan yangilikka aylandi. Shuningdek, chap tomonidan yana ikkita Type-C porti va naushniklar uchun 3,5 millimetrli razyomi o‘rin olgan.

Noutbuklar 14 va 16 dyuymli ekranlar bilan taqdim etiladi, tasvir yangilanish chastotasi 120 gertsga teng. Ekranlarning standart yorqinligi 1000 nit, maksimali — 1600 nit. Kamera sifati ikki barobar oshirilgan.

Foto: Apple

Gadjetlar alyuminiy korpus, ikkita kuler asosidagi yangi sovitish tizimi va ancha tezkor SSD’ga ega bo‘lgan. Kichik versiyaning avtonomligi 10 soat video tomosha qilish, kattasini esa 17 soatga yetadi.

Foto: Apple

Yangi protsessorlar

MacBook Pro yangi M1 Pro protsessorlari asosida yasalgan bo‘lib, ularning unumdorligi M1’dan 70 foizga yuqori. Biroq buyurtma uchun yanada unumdorroq M1 Max varianti ham taqdim etiladi.

M1 Pro’da 10 ta yadro mavjud, jumladan, uning 8 tasi yuqori samarador va 2 tasi energiya samarador hisoblanadi, grafikasiga 16 yadroli tezlashtirgich javob beradi. Protsessor 32 gigabaytli birlashgan xotira yordamida qo‘llab-quvvatlanadi. Chip oddiy grafika borasi M1’dan ikki barobar, samaradorlik bo‘yicha uch barobar kuchli bo‘lib chiqdi.

Mi Max versiyasi yanada yaxshilangan variant hisoblanadi — u 32 yadroli GPU’dan iborat, maksimal birlashgan xotirasi 64 gigabaytgacha oshirilgan. Kompaniyadagilarning ta’kidlashicha, bu noutbuklar uchun mo‘ljallangan dunyodagi eng kuchli protsessordir.

14 dyuymli ekranga ega yangi MacBook narxi 1999 dollardan, 16 dyuymlisi 2499 dollardan boshlanadi. Yangi gadjetlarning barchasini keyingi haftadan boshlab xarid qilish mumkin bo‘ladi.