19-oktabr soat 17:00 da O‘zbekiston prezidentligiga nomzodlarning vakillari o‘rtasida teledebat bo‘lib o‘tadi. Bu haqda O‘zMTRK xabar berdi.

Ma’lum qilinishicha, O‘zbekiston milliy teleradiokanallari orqali O‘zbekiston prezidenti saylovida nomzodlarning vakillari o‘rtasidagi teledebat namoyish etiladi. Teledebatlarni “O‘zbekiston24”, “O‘zbekiston”, “Yoshlar”, “Mahalla” va “Madaniyat va ma’rifat” telekanallari orqali tomosha qilish mumkin bo‘ladi.

Shuningdek, aholining barcha qatlamlarini qamrab olish maqsadida “O‘zbekiston24” va “O‘zbekiston” kanallarida debatlar surdotarjima bilan namoyish etiladi. “Yoshlar” va “Toshkent” kanallarida debatlar ruscha tarjimada, “Madaniyat va ma’rifat” kanalida esa inglizcha tarjimada beriladi.

Bundan tashqari, O‘zMTRKning onlayn platformasi — “uztv.uz” orqali ham teledebatlarni tomosha qilish mumkin bo‘ladi.

Avvalroq Respublika “Ijtimoiy fikr” jamoatchilik fikrini o‘rganish markazi 24-oktabr kuni bo‘lib o‘tadigan prezident saylovlari bo‘yicha telefon orqali so‘rovning to‘rtinchi bosqichi natijalarini e’lon qilgandi. O‘shanda so‘rov ishtirokchilarining deyarli yarmi prezidentlikka nomzodlar teledebat qilishlarini yoqlagan edi.

Ma’lumot uchun, prezident saylovi 24-oktabr kuni o‘tkaziladi. Saylovga jami 300 milliard so‘m, har bir nomzodga esa 3 milliard so‘mdan ajratiladi.