Oliy Majlis Qonunchilik palatasi majlisida O‘zbekiston Prezidentining farqlovchi belgilari, ya’ni o‘z belgisi va shtandartini (bayrog‘i) joriy etishga oid qonun muhokama qilindi, deb xabar beradi Adliya vazirligi matbuot kotibi.

Foto: Adliya vazirligi matbuot kotibi

Ta’kidlanishicha, deputatlarga qonun loyihasini adliya vaziri Ruslanbek Davletov taqdim qilgan.

Qonun loyihasi bilan O‘zbekiston Prezidentining farqlovchi belgilari, ya’ni o‘z belgisi va shtandarti (bayrog‘i) yuzasidan qoidalar kiritilmoqda.

“Xorijiy davlatlarda davlat rahbarining o‘z belgisi va shtandarti yangi saylangan prezidentga qasamyod qabul qilgandan keyin topshirilishi belgilangan. O‘zbekiston qonunchiligida ushbu masalalar tartibga solinmagani bois, qonunchilikni tegishli mazmundagi norma bilan to‘ldirish taklif etilmoqda”, — deyiladi xabarda.

Ushbu tartib lavozimga saylangan shaxsni prezidentlik lavozimiga yuklatilgan murakkab vazifalarni samarali amalga oshirishiga xalq va jamiyat tomonidan bildirilgan ishonch belgisi sifatida xizmat qilishi ta’kidlangan.

“Gazeta.uz”ning yozishicha, hujjat Senatga yuborilgan. Endi qonun yuqori palata tomonidan ham ma’qullanishi lozim.