Jons Hopkins universiteti ma’lumotlariga ko‘ra, dunyoda koronavirusga chalinganlar soni 240 748 401 kishini tashkil qilmoqda, shularning 4 900 105 nafari vafot etgan. Ayni vaqtga qadar jahon bo‘yicha 6,632 milliard doza vaksina qo‘llanilgan.

Kasallanganlar soni bo‘yicha AQSh (44,9 million), Hindiston (34 million), Braziliya (21,6 million), Buyuk Britaniya (8,4 million) va Rossiya (7,9 million) eng oldinda bormoqda.

Filippin

Foto: AP Photo

COVID-19 ning yangi shtammlari paydo bo‘lishiga ta’sir qiladigan omil ma’lum qilindi

Turli mamlakatlarda koronavirusga qarshi vaksinaning noteng taqsimlanishi iqtisodiy pasayishning davom etishiga hamda COVID-19 ning yangi shtammlari paydo bo‘lishiga olib kelmoqda. Bunday fikrni BMT bosh kotibi Antoniu Guterrish ma’lum qildi.

Uning so‘zlariga ko‘ra, dunyo muvofiqlashtirilgan va teng yondashuvga amal qilmasa, kasallanish holatlarining barqaror qisqarishiga birorta ham davlatda erishib bo‘lmaydi.

Koronavirusga qarshi vaksinalarni boy va kambag‘al mamlakatlar o‘rtasida teng taqsimlash imkonini berish uchun COVAX loyihasi bor. Uni Jahon sog‘liqni saqlash tashkiloti (JSST), BMTning Bolalar fondi (YuNISEF) va GAVI alyansi — nochor mamlakatlarda bolalarni emlash imkonini beruvchi xususiy va hukumat tashkilotlari sherikligi tomonidan amalga oshiriladi. Ushbu mexanizm orqali Moldova hamda Afrikaning ba’zi davlatlari COVID-19 ga qarshi bepul vaksina bilan ta’minlandi.

Rossiyada ketma-ket besh kundan buyon kasallanganlar soni bo‘yicha rekord o‘rnatilmoqda

Rossiyada o‘tgan bir kecha-kunduzda 34 325 kishida koronavirus aniqlandi, bu pandemiya boshidan buyon eng yuqori ko‘rsatkichdir.

Kasallanganlar sonining kunlik o‘sishi ketma-ket besh kundan buyon rekord o‘rnatmoqda. 14-oktabr kuni ushbu ko‘rsatkich 31 ming kishidan oshdi, undan keyingi kunlarda yana taxminan ming kishiga ko‘paydi. 17-oktabr kuni mamlakatda 34 303 kishi kasallandi.

Shuningdek, bir kun ichida 998 kishi vafot etdi. O‘lim holatlari 16-oktabrda o‘rnatilgan rekord ko‘rsatkichga yaqin darajada saqlanib qolmoqda, o‘shanda bir sutkada birinchi marta mingdan ortiq kishi vafot etgandi.

Tezkor shtabga ko‘ra, Rossiyada pandemiya boshidan buyon 8 milliondan ortiq odam koronavirusni yuqtirib olgan, 224,3 ming kishi vafot etgan.

Gruziyada koronavirusning beshinchi to‘lqini boshlandi

Gruziyada epidemiologik vaziyatning yomonlashishi koronavirus beshinchi to‘lqini boshlanganidan darak beradi. Bu haqda Kasalliklar ustidan nazorat bo‘yicha milliy markaz rahbari Amiran Gamkrelidze ma’lum qildi. U COVID-19 ga qarshi kurash bo‘yicha hukumat siyosatini ishlab chiqishda asosiy ishtirokchilardan biri hisoblanadi.

“Bu hayot va mamot masalasi. Hamma emlanishi kerak, hamma niqob taqishi kerak. Aks holda noyabr Gruziya uchun eng og‘ir bo‘ladi”, — deya ogohlantirdi Amiran Gamkrelidze.

Gruziyalik epidemiologlar fikricha, vaziyat yomonlashuvining asosiy sababchisi — aholi orasida vaksinatsiya darajasining o‘ta pastligi. SSV ma’lumotlariga ko‘ra, Gruziyada Pfizer, AstraZeneca, Sinovac va Sinopharm vaksinalari bilan aholining 22 foizigina to‘liq emlangan. Yil oxirigacha “ommaviy immunitet” ishlab chiqilishi uchun har kuni kamida 30—40 ming kishi emlanishi kerak, ammo ayni paytda kunlik vaksinatsiya 4—5 ming kishiga teng.

Pandemiya boshidan buyon Gruziyada 665 mingdan ortiq odam virusni yuqtirib olgan, shularning 9470 dan ziyodi vafot etgan.

Melburn kelasi haftadan lokdaunni bekor qilmoqchi

Avstraliyaning aholi soni bo‘yicha ikkinchi o‘rinda turadigan Melburn shahrida kelasi hafta qat’iy lokdaun rejimi bekor qilinadi.

“Payshanba 23:59 (Toshkent vaqti bilan 21-oktabr 17:59)dan boshqa lokdaun bo‘lmaydi, uydan chiqishga cheklovlar va komendantlik soati bo‘lmaydi”, — dedi Viktoriya shtati bosh vaziri Deniyel Endryusga tayanib.

Shu tariqa, Melburnda hisob bo‘yicha oltinchi lokdaun rejalashtirilganidan besh kun avvalroq yakunlanadi. Bunday qarorning asosiy sababi — Viktoriya shtati aholisini koronavirusga qarshi emlash jarayonining faollashgani. 21-oktabrga qadar 16 yoshdan oshgan aholining 70 foizini to‘liq emlash rejalashtirilmoqda.

Ta’kidlanishicha, lokdaun bekor qilinishiga qaramasdan, Melburn aholisi hamon o‘z aglomeratsiyasini tark etib boshqa tumanlarga keta olmaydi. Boshqa bir qator cheklovlar ham o‘z kuchida qoladi. Vaksinatsiya ko‘lamiga qarab keyinroq boshqa cheklovlar ham bekor qilinishi mumkin.