So‘xdagi aerodrom qurilishi yakunlandi, yaqin kunlarda sinov uchishlari amalga oshiriladi
Farg‘ona viloyatining So‘x tumanida aerodrom qurilishi yakunlandi, yaqin kunlarda sinov uchishlari amalga oshiriladi. Bu haqda viloyat hokimi Xayrullo Bozorovning tumanga tashrifi davomida ma’lum qilindi, deya xabar berdi “Daryo” muxbiri Azizjon Ermatov.
Ma’lum qilinishicha, tumanga kichik aviatsiya transporti qatnovini yo‘lga qo‘yish maqsadida “Navobod” mahalla fuqarolar yig‘ini hududida samolyot va vertolyotlar uchun uchish-qo‘nish maydonchasi tashkil etilmoqda.
Mazkur aerodrom qurilishi uchun qariyb 7 gektar yer maydoni ajratilgan. Uchish-qo‘nish maydonchasining uzunligi 650 metrni, eni esa 100 metrni tashkil etadi.
Qurilish ishlari uchun 6,8 milliard so‘m mablag‘ ajratilib, kutish zali, ovqatlanish shoxobchasi, savdo nuqtasi, dam olish joylarini o‘zida qamrab olgan zamonaviy majmua bunyod etilgan.
Ma’lumot uchun, O‘zbekiston Prezidentining “2020-2021-yillarda Farg‘ona viloyatining So‘x tumanini kompleks ijtimoiy-iqtisodiy rivojlantirish chora-tadbirlari to‘g‘risida”gi qarorida So‘x tumanida samolyot va vertolyotlar uchun uchish-qo‘nish maydonchalari tashkil etilishi belgilangan edi. Parvozlar uchun An samolyotlari va Mi-8 vertolyotlaridan foydalanish rejalashtirilgan.
