O‘zbekistondagi bog‘chalarda 9 oyda 6,6 mlrd so‘mlik ish haqi va tovarlar o‘zlashtirib yuborilgan — Maktabgacha ta’lim vazirligi

O‘zbekistondagi maktabgacha ta’lim tashkilotlarida 6,6 milliard so‘mlik ish haqi va tovarlar noqonuniy o‘zlashtirilgan. Bundan ishlamaydigan xodimlar nomiga yozilgan ish haqlari 2,4 milliard so‘mni tashkil qiladi. Bu haqda AOKAda Maktabgacha ta’lim vazirligi mutasaddilari ishtirokida o‘tkazilgan matbuot anjumanida ma’lum qilindi.

Qayd etilishicha, ichki audit xizmati tomonidan 2021-yilning 9 oyi davomida tizimdagi tashkilotlarda jami 282 ta nazorat tadbiri o‘tkazilgan.

O‘tkazilgan profilaktika natijasida 5,5 milliard so‘mlik mablag‘ va tovarlarning talon-toroj bo‘lishining oldi olingan.

Misol uchun, Andijon viloyati 9 ta tuman va shaharlarida 2,8 milliard so‘mlik mebel jihozlari buxgalteriya balansiga kirim qilinmagan.

Sirdaryo viloyati Mirzaobod tumanida 2021-yilning yanvar oyida xarid qilingan mebel jihozlari 5 oydan buyon kirim qilinmasdan kelayotganligi aniqlanib, o‘rnatilgan tartibda tashkilot hisobiga kirim qilingan.

Tashkilotlar mulkini qayta xatlar inventarizatsiya qilish natijasida 962 million so‘mlik tovar moddiy boyliklar ortiqchaligi aniqlanib, tashkilot hisobiga qayta kirim qilingan.

Bundan tashqari, oziq-ovqat mahsulotlari to‘liq olinmagan bo‘lsa-da, Navoiy viloyati Xatirchi tumani MTB tomonidan 100 foiz pullarni ta’minotchiga o‘tkazib berish oqibatida 152 million so‘m muddati o‘tgan debitor qarzdorlik yuzaga kelgan. Shundan 66 million so‘m 2018—2019-yildan buyon undirilmagan va undirish choralari ko‘rilmagan.

Mulkni sotishdan tushgan mablag‘lardan 242 million so‘mi tegishli mahalliy budjetlarning daromadiga o‘tkazib berilmagan.

Samarqand viloyati Kattaqo‘rg‘on tumanida 57 million, Surxondaryo viloyati Termiz shahrida 72 million so‘m mulkni sotishdan tushgan mablag‘lar budjetga o‘tkazib berilmagan.

Davlat xarid qonunchiligi talablariga amal qilmasdan amalga oshirilgan xaridlar 10,5 milliard so‘mni tashkil etgan.

Masalan, Termiz shahar maktabgacha ta’lim bo‘limida tanlov komissiyasi a’zosi bo‘lgan buxgalteriya xodimining turmush o‘rtog‘iga tegishli “Real stroy siti” korxonasi joriy ta’mirlash, mebel jihozlari xarid qilish bo‘yicha o‘tkazilgan 3,2 million so‘mlik tanlovda g‘olib deb topilgan. Vaholanki, Davlat xarid qonunida manfaatlar to‘qnashuviga yo‘l qo‘yib bo‘lmaydi.

O‘tkazilayotgan profilaktika natijasida esa tovar moddiy boyliklarni xarid qilish va joriy ta’mirlash ishlarini amalga oshirish uchun davlat xaridlari elektron portaliga joylashtirilgan e’lonlar noto‘g‘ri qo‘yilgani, ya’ni xarid bo‘yicha to‘liq ma’lumotlar joylashtirilmagani yoki bajarish muddatlarining sun’iy ravishda kam ko‘rsatilishi natijasida 4 milliard so‘mlik e’lonlar bekor qilinib, qayta joylashtirilishi ta’minlandi.

Ish haqi va unga tenglashtirilgan to‘lovlar hamda tovar moddiy boyliklaridan 6,6 milliard so‘m kamomad va noqonuniy o‘zlashtirish holatlari aniqlangan. Shundan ishlamaydigan xodimlar nomiga yozilgan ish haqlari 2,4 milliard so‘mni tashkil etadi.

• Chilonzor tumanidagi 291-sonli MTT 2020—2021-yillarda 8 nafar ishlamagan va vazifalarini bajarmagan xodimlarga 32 million so‘m;
• Qoraqalpog‘iston Qonliko‘l tumanidagi 1-son DMTT ishlamagan va vazifalarini bajarmagan xodimlarga 8 million so‘m;
• Samarqand shahardagi 58-sonli MTTda 2019—2021-yillarda 5 nafar ishlamagan va vazifalarini bajarmagan xodimlarga 17 million so‘m noqonuniy hisobdan chiqarilgan.