O‘zbekistonda tamaki va alkogol mahsulotlarni ishlab chiqarish ustidan nazorat kuchaytiriladi

Vazirlar Mahkamasining “Iste’mol va texnik etil spirti, alkogol va tamaki mahsulotlari muomalasini tartibga solish sohasidagi normativ-huquqiy hujjatlarni tasdiqlash to‘g‘risida”gi qaroriga ko‘ra, O‘zbekistonda alkogol va tamaki mahsulotlarini ishlab chiqarish ustidan nazorat kuchaytiriladi, deb xabar beradi Norma.

Qaror bilan quyidagilar tasdiqlangan:

• iste’mol va texnik etil spirti hamda alkogol mahsulotlarini ishlab chiqarishda o‘lchov uskunalarini hamda hisobga olish axborot tizimiga axborot uzatuvchi boshqa qayd etish vositalarini o‘rnatishni nazarda tutuvchi nizom;
• chakana savdo hamda umumiy ovqatlanish korxonalarida alkogol va tamaki mahsulotlarining nazorat xaraidini amalga oshirish, ularning namunalarini sinov laboratoriyalarida ekspertizadan o‘tkazish va mazkur xarajatlarni moliyalashtirishni nazarda tutuvchi nizom.

Nizom iste’mol va texnik etil spirti, alkogol mahsulotlarini ishlab chiqarishda o‘lchov uskunalarini hamda hajmini avtomatlashtirilgan o‘lchash va hisobga olish vositalari bilan jihozlashni belgilaydi. Hujjat bilan quyidagilar tasdiqlangan:

• o‘lchov vositalarini o‘rnatish;
• asosiy texnologik asbob-uskunalarni o‘lchash vositalari bilan jihozlash sxemasi;
• plombalash va plombalarni yechish.

Asosiy texnologik uskunalarni o‘lchash asboblari bilan jihozlash joylari tashkilot tomonidan alohida sxemada ko‘rsatiladi. U tashkilot rahbari tomonidan imzolanadi va muhrlanadi. Sxemaning bir nusxasi tashkilotda qoladi, ikkinchisi Alkogol va tamaki bozorini tartibga solish hamda vinochilikni rivojlantirish agentligida saqlanadi.

Uskunalar qonun hujjatlariga muvofiq har ikki yilda bir marta tekshiriladi.

O‘lchov asboblari bilan jihozlangan asosiy texnologik uskunalar agentlikning vakolatli mansabdor shaxsi tomonidan tashkilotning vakolatli vakili ishtirokida muhrlanadi. Muhr tegishli akt bilan tasdiqlanadi.

Avvalroq “Yangi O‘zbekiston” tovar belgisi ostida alkogol ichimlik ishlab chiqarilishi mumkinligi to‘g‘risida xabar berilgandi.