O‘zbekistonda 24-oktabr kuni o‘tkaziladigan prezidentlik saylovlarida har bir tuman va shahardagi bitta saylov uchastkasiga videokameralar o‘rnatiladi. Bu haqda Markaziy saylov komissiyasi raisining o‘rinbosari Bahrom Qo‘chqorov ma’lum qildi.

Foto: “Daryo” / Madina Nurman

“Bugungi kunda xorijiy tajriba va mavjud imkoniyatlardan kelib chiqib, joriy yilning 24-oktabr kuni bo‘lib o‘tadigan prezident saylovida har bir tuman va shahardagi 1 tadan namunaviy saylov uchastkalarida 2 tadan kamera va zaruriy qurilmalarni o‘rnatish bo‘yicha tegishli chora tadbirlar amalga oshirilmoqda. Raqamlar bilan aytadigan bo‘lsak, 207 ta tuman va shaharlarda jami 414 ta kuzatuv kameralari o‘rnatilishi belgilangan. 2019-yilga nisbatan bu 147 foiz ko‘proq degani”, — deydi u.

Qo‘chqorovning so‘zlariga ko‘ra, 414 ta videokuzatuv kameralari o‘rnatiladigan 207 ta saylov uchastkalarni mahalliy hokimliklar Axborot texnologiyalari va kommunikatsiyalarini rivojlantirish vazirligi bilan hamkorlikda tanlab olgan va ularning ro‘yxatlari shakllantirgan. Shuningdek, uning qo‘shimcha qilishicha, Oliy Majlis Qonunchilik palatasi va mahalliy kengashlarga 2019-yili o‘tgan saylovlarda sinov tariqasida 60 ta saylov uchastkasida 120 ta kuzatuv videokamerasi o‘rnatilgan edi.

“Taklif etilayotgan saylov uchastkalarga videokuzatuv kameralari o‘rnatilib, ovoz berish jarayonlari Markaziy saylov komissiyasining Saylov2021.uz saylov portali, Matbuot markazidagi katta hajmdagi monitorda va “O‘zbekiston24” telekanalida hamda Markaziy saylov komissiyasi binosida onlayn translyatsiya qilib boriladi. Translyatsiya vaqti 24-oktabr kuni soat 08:00 dan 20:00 gacha belgilangan”, — deydi MSK raisi o‘rinbosari.

Bundan avval chet eldagi O‘zbekiston fuqarolari uchun 49 ta davlatda statsionar va ko‘chma saylov uchastkalari tashkil etilishi, O‘zbekiston Prezidenti saylovlarini o‘tkazish uchun saylov okruglari tashkil etilgani to‘g‘risida xabar berilgandi.