Google LLC va Microsoft Ireland Operations Limited (Microsoft Store operatori) kompaniyalari O‘zbekistonda QQS to‘lovchilar sifatida ro‘yxatdan o‘tdi. Bu haqda Davlat soliq qo‘mitasi ma’lumotlariga tayanib “Gazeta.uz” xabar qildi.
So‘nggi ikki yil ichida mamlakat soliq to‘lovchilar ro‘yxatiga, shuningdek, AQSh va Irlandiyada ro‘yxatdan o‘tgan Google Commerce Limited, Google Voice, Google Ireland Limited va Google Cloud EMEA kompaniyalari ham qo‘shildi.
Xsolla, Netflix, Apple, Samsung, Booking.com, Facebook, Spotify, LinkedIn va boshqa xorij kompaniyalari ham QQS ofisi tarkibiga kiradi.
2020-yilning 1-yanvaridan kuchga kirgan yangi tahrirdagi Soliq kodeksida “Google solig‘i” ko‘zda tutilgan. Oradan bir oy o‘tgach, Davlat soliq qo‘mitasi xorijlik internet kompaniyalari soliq to‘lovchi sifatida ro‘yxatdan o‘tishlari uchun QQS-ofisini ochdi.
“Google solig‘i” boshqa mamlakatlarda ham mavjud. Rossiyada 2016-yildan beri elektron xizmatlarni sotishda QQS to‘lanishini tartibga soluvchi qonun ishlayapti. Soliq internet orqali ko‘rsatiladigan barcha xizmatlardan, jumladan, dasturlar, o‘yinlar, sayt xostinglari, qo‘shiqlar, film va boshqalar sotuvidan undiriladi.
Izoh (0)