O‘zbekistonning amaldagi Prezidenti, O‘zLiDePdan prezidentlikka nomzod Shavkat Mirziyoyev 12-oktabr kuni buxorolik saylovchilar bilan bo‘lib o‘tgan uchrashuvda viloyatda shamol, quyosh va issiqlik elektr stansiyalari qurilishini aytdi.
Shavkat Mirziyoyev viloyatda elektr energiyasi ishlab chiqarish manbalari yo‘qligini qayd etdi.
“Shuning uchun, 1,6 milliard dollar to‘g‘ridan to‘g‘ri xorijiy investitsiya hisobidan 4 ta shamol, quyosh va issiqlik elektr stansiyasi barpo etiladi. Ushbu stansiyalar yiliga 6,3 milliard kilovatt-soat yoki viloyat ehtiyojiga nisbatan ikki barobar ko‘p elektr energiyasi ishlab chiqaradi. Jumladan, 2023-yilda Peshku va G‘ijduvonda jami quvvati 1 ming megavatt bo‘lgan 2 ta shamol elektr stansiyasi quriladi”, — deya uning so‘zlarini keltirmoqda “Daryo” muxbiri.
Ma’lumot uchun, Prezidentning 23-fevraldagi qarori bilan Buxoro viloyatining Peshku va G‘ijduvon tumanlarida ikkita shamol elektr stansiyasini qurish to‘g‘risidagi investitsiya kelishuvi tasdiqlangan.
Buxoro viloyatida 500—1000 megavatt quvvatli ikkita shamol elektr stansiyasi qurilishi, buning uchun viloyatning Peshku hamda G‘ijduvon tumani hududlari tanlab olingani haqida 2020-yilning iyulida ma’lum bo‘lgandi. 2020-yilning sentabrida Peshku va G‘ijduvon tumanlarida shamol elektr stansiyalarining 10 meteorologik ustuni o‘rnatilgandi.
Mazkur stansiyalarni qurish bo‘yicha Energetika vazirligi hamda investor va loyiha kompaniyasi bo‘lgan Saudiya Arabistoni ACWA Power o‘rtasida kelishuv 2021-yilning 24-yanvarida imzolandi. Kompaniya tomonidan Peshku tumanida ACWA Power Dzhankeldy Wind, G‘ijduvon tumanida esa ACWA Power Bash Wind ta’sis etildi.
G‘ijduvon tumanidagi shamol elektr stansiyasi quvvati 500 megavattni, Peshku tumanidagi shamol elektr stansiyasi quvvati esa 300—500 megavattni tashkil etadi. Har bir loyihani amalga oshirish uchun investor 650 million dollardan mablag‘ ajratmoqchi.
Izoh (0)