“Rossiya 24” telekanali 9-oktabr kuni “O‘zbekiston. Eng yangi tarix” nomli hujjatli filmni taqdim etdi. Unda asosan O‘zbekistonda so‘nggi besh yilda yuz bergan ijobiy o‘zgarishlar haqida so‘z boradi. Filmda Prezident Shavkat Mirziyoyevning turli tadbirlaridagi chiqishlari, viloyatlarga safarlari, korxona va tashkilotlardagi uchrashuvlari, joylardagi faollar bilan muloqotlaridan lavhalar ham berilgan.

Lavhalarning birida, jumladan, davlat rahbari Surxondaryo viloyati Angor tumanidagi “Angor Surxon g‘ururi” klasteriga tashrifi davomida mulozimlardan biriga telefon orqali topshiriq berayotgani aks etgan. Prezident bu klasterda 2021-yilning 1-iyun kuni bo‘lgan edi.

“Assalomu alaykum! Hozir men Angor tumanidaman. Angor tumanining klasteri bor, bugun kechga butun klasterni aylanib, hamma masalasini hal qilib berib, ertaga ertalab menga hisobot berasan. Shunday xizmat qilginki, u sendan minnatdor bo‘lsin. Bu mening topshirig‘im”, — deb Prezident Shavkat Mirziyoyev qo‘lidagi iPhone’ni klaster xodimlaridan biriga uzatadi.

Avvalroq, avgust oyida ijtimoiy tarmoqlarda Prezident Shavkat Mirziyoyev iPhone smartfoni orqali muloqot qilayotgani aks etgan surat tarqalgan edi, biroq bu suratning qachon va qayerda olinganiga aniqlik kiritilmagan edi.

Foto: Telegram / “Chto tam u uzbekov?”

2019-yil avgust oyida o‘sha vaqtdagi Prezident matbuot kotibi Komil Allamjonov Alter Ego dasturiga bergan intervyusida “Prezident mobil telefondan foydalanadimi?” degan savolga: “Men buni aniq bilmayman, lekin bir-ikki marta mobil telefon orqali gaplashganini ko‘rganman”, deya javob bergan edi.

Qayd etish joiz, Mirziyoyev “Angor Surxon g‘ururi” klasteriga tashrifi davomida g‘alla o‘rish kombaynini ham boshqargan edi.