Xitoyda ommaviy raqsga tushuvchilar tomonidan chiqadigan shovqinni bartaraf etishga mo‘ljallangan noodatiy gadjet mashhurlikka erishmoqda, deb xabar beradi Hi-Tech.Mail.ru.

Foto: Vice

Xitoy shaharlarining jamoat joylarida raqsga tushish keksa aholi orasida keng tarqalgan. Shu orqali odamlar sport bilan shug‘ullanadi, do‘stlari bilan muloqot qiladi va yangi tanishlar orttiradi. Shu bilan birga, raqslar uchun musiqa juda baland yangraydi va shaharning boshqa aholisi bundan norozi.

“Raqsga tushayotgan buvilar”ga qarshi kurash bo‘yicha bir nechta urinishlardan so‘ng (2013-yilda kollektivlardan biri ularga axlat otgan, 2016-yilda esa bir erkak musiqiy kolonkaga pnevmatik pistoletdan o‘q uzgan) bunga qarshi yangi usul o‘ylab topildi. Ular kolonkaga mos keluvchi maxsus pultlarni sotib olib, uning yordamida musiqa ovozini boshqarmoqda.

Kolonka kutilmaganda o‘chib qolsa, raqsga tushayotganlar o‘z qurilmalari buzilib qoldi deb o‘ylaydi va tarqalib ketadi. Pultni 19 yoshli Xan Ley ismli biznesmen yaratgan bo‘lib, u bir kechaning o‘zida 36 ta raqs guruhini quvib yuborishga muvaffaq bo‘lganini aytgan.

Vice’ning yozishicha, pult narxi 15—40 dollar oralig‘ida bo‘lib, kichikligi sabab hamyonga sig‘adi. Pultni Xitoydagi mashhur internet maydonchalari orali topish mumkin. Ixtirochining so‘zlariga ko‘ra, so‘nggi to‘rt oy ichida ushbu qurilmadan 20 ming nusxadan ortiq sotilgan.