Red Wings Airlines aviakompaniyasi Yekaterinburgdan O‘zbekiston va MDHning boshqa bir qator shaharlariga parvozlarni yo‘lga qo‘yishni rejalashtirmoqda, deb xabar berdi Spot “Kommersant”ga tayanib.
Ma’lum bo‘lishicha, Red Wings samolyotlari Samarqand, Buxoro va Navoiyga uchishi ko‘zda tutilgan. Umuman olganda, aviakompaniya 30 ta xalqaro va mintaqaviy yo‘nalishga reyslarni rejalashtirmoqda. Qozog‘istonning Nur-Sulton va Olmaota shaharlari, Ozarbayjon poytaxti Boku va Armaniston poytaxti Yerevan shular jumlasidandir.
Bu qaror Yekaterinburgning Koltsovo aeroportida Red Wings markazi tashkil etilganining bir yilligi munosabati bilan o‘tkazilgan matbuot anjumanida e’lon qilindi.
Aviakompaniya bosh direktori Yevgeniy Klyucharyovning so‘zlariga ko‘ra, reyslarni ochish bo‘yicha yakuniy qaror epidemiologik vaziyatni hisobga olgan holda qabul qilinadi.
“TASS” xabariga ko‘ra, 2021-yil aprel oyida kompaniya O‘zbekiston bilan Yekaterinburg va Chelyabinskdan parvozlarni tashkil etish bo‘yicha muzokaralarni boshladi.
Ilk marta Red Wings aviakompaniyasi 2018-yilda Moskva—Namangan, Moskva—Farg‘ona va Moskva—Navoiy yo‘nalishlarida reyslarni yo‘lga qo‘ygandi.
Izoh (0)