Namangan shahar MIB tomonidan 2021-yil fevral oyida viloyat Iqtisodiy jinoyatlarga qarshi kurashish departamenti bilan birga o‘tkazilgan tezkor tadbir davomida ikki fuqaro 50 dollarlik 141 ta qalbaki kupyurani muomalaga kiritayotgan vaqtida qo‘lga olingan edi.
Ular Jinoyat kodeksining 176-moddasi 2-qismi “b” va “v” bandlari (bir guruh shaxslar tomonidan oldindan til biriktirib ko‘p miqdorda qalbaki chet el valyutasini o‘tkazish) bilan aybdor deb topilib, 5 yilga ozodlikdan mahrum etilgan. 8-oktabr kuni esa sud qarori ijrosini to‘liq ta’minlash maqsadida daliliy ashyo — qalbaki 7050 dollar yoqib yuborildi.
Namangan viloyati MIB matbuot kotibi Sohibjon Rapiqovning “Daryo”ga ma’lum qilishicha, viloyatda 2021-yil boshidan beri kamida uch marta shunday rasmiy “dollar yoqish” tadbiri o‘tkazilgan bo‘lib, umumiy hisobda 27 150 qalbaki dollar yo‘q qilingan. Taqqoslash uchun, Sirdaryoda yil boshida bitta holatda aniqlangan 20 ming qalbaki dollar MIB tomonidan yoqib yuborilgan edi.
Izoh (0)