Ko‘rish qobiliyati bilan bog‘liq muammolar, kasalliklar nafaqat ekran qarshisida muntazam ravishda o‘tiradigan kishilar, balki boshqalarda ham kuzatilishi mumkin bo‘ladi. Chunki kundalik turmushdagi oddiy harakatlar ham mikroorganizmlar ko‘zga tushishga sabab bo‘lib, yallig‘lanishga olib kelishi mumkin. Qanday odatlar ko‘rish sifatining buzilishiga ta’sir qilishi mumkinligi haqida oftalmolog-shifokor Yevgeniya Shekunova ma’lumot berib o‘tadi.
Aksariyat kishilar vaqtini ekran qarshisida o‘tkazadi
Bunday odamlar ko‘zni ortiqcha zo‘riqtirmaslik kerakligini yoddan chiqaradi. Ammo gadjet va noutbukning yorug‘ligi me’yorda bo‘lishiga, ko‘z va monitor o‘rtasidagi masofaga e’tibor berish kerak. Ko‘z toliqib qolmasligi uchun qurilmaning yorug‘ligi 45-50 foiz bo‘lishiga e’tibor qarating. Ekranga qaraganda matnni yaqindan o‘qish istagi paydo bo‘lmasligi kerak. Ekran yorug‘ligi atrofdagidan biroz yorqinroq bo‘lgan yaxshi. Yetarli namlanishga ehtiyoj sezgani sabab ham ko‘zlarni ochib-yumishni kanda qilmang. Mushaklar toliqishi mumkinligi sabab esa har 30 daqiqada dam olib ishlash kerakligini unutmang.
Makiyajni noto‘g‘ri o‘chirish
Tashqi olamdagi 90 foizi axborotni qabul qilishimizda ahamiyatli bo‘lgan ko‘zlar, shuningdek, his-tuyg‘ularni o‘qish mumkin bo‘lgan qalb oynasi ham sanaladi. Ayol va qizlar esa go‘zalligiga urg‘u berishda ko‘zlariga alohida e’tibor qaratadi. Ammo bu borada juda ham ehtiyotkor bo‘lgan yaxshi. Gap shundaki, tush, podvodka ten va boshqa kosmetik vositalarining kirib qolishi ko‘z shilliq qavatini shikastlab, jiddiy zararlanishga olib kelishi mumkin. Bu kabi muammodan yuzni parvarish qilish va makiyajni o‘chirishdan avval ham qochib bo‘lmaydi.
Ko‘z salomatligiga, shuningdek, gigiyena qoidalariga rioya qilmaslik, uyda va salonda makiyaj qilishdagi xatolar ham sabab bo‘ladi. Shu sabab ham foydalanadigan cho‘tka hamda boshqa vositalarning tozaligiga yetarlicha e’tiborli bo‘lish, boshqalarning kosmetikasidan iloji boricha foydalanmaslik kerak.
Ko‘zlarni ishqalash
Ish davomida, masalan, ekran qarshisida o‘tirganda ko‘zlarni ishqalash nafaqat qichish, balki muguz pardaning shikastlanishiga ham olib kelishi mumkin. Gap shundaki, bu vaqtda yuvilmagan qo‘ldagi mikroorganizmlar ko‘zga kirishi, keyinchalik yallig‘lanish keltirib chiqarib, ko‘rish bilan bog‘liq muammolarning yuzaga kelishiga olib kelishi mumkin. Yaxshisi ko‘zni ishqalashga nima sabab bo‘layotganini aniqlash uchun oftalmolog-shifokor bilan maslahatlashing. Mutaxassis muammoga yechim bo‘ladigan tomchi dorilarni taklif qilishi mumkin.
Oftalmolog-shifokorga bormaslik
Ta’kidlangan qoidalarga rioya qilishdan tashqari, yilda bir marta shifokorga murojaat qilishni ham kanda qilmaslik kerak. Bu hatto ko‘rish qobiliyati bilan muammo bo‘lmagan kishilarga ham tegishli. Shundagina turli oqibatlarning oldini olishga erishish mumkin bo‘ladi. Shifokor ko‘rikdan keyin sizga ekran nurlaridan himoya qiluvchi yoki ko‘rishga qulay bo‘lgan ko‘zoynak hamda linza taqishni tavsiya qiladi.
Izoh (0)