“Taxtlar o‘yini”ning Targariyenlar o‘rtasidagi urushi haqida so‘zlovchi “Ajdar uyi” filmining birinchi tizeri chiqdi

HBO Max striming servisi “Taxtlar o‘yini”ning prikveli — “Ajdar uyi”ning birinchi tizerini taqdim etdi, deb xabar beradi Esquire.

Serial Jorj R.R.Martinning “Olov va qon” asariga asoslangan. Shoudagi voqealar “Taxtlar o‘yini”da tasvirlangan hodisalardan 200 yil oldin sodir bo‘ladi. Sujet markazidan “Ajdarlar raqsi” deya mashhurlikka erishgan Targariyenlar o‘rtasidagi fuqarolik urushi o‘rin olgan.

“Ajdar uyi”da Peddi Konsidayn, Emma D’Arsi, Oliviya Kuk, Mett Smit va boshqalar rol ijro etgan. Kartinaga “Taxtlar o‘yini”ning bir nechta epizodini tasvirga olgan Migel Sapochnik ijrochi prodyuseri sifatida ishtirok etadi.

“Orzular emas, ajdarlar bizni qirol qildi”, — deyiladi tizerda. Serial premyerasi 2022-yilga rejalashtirilgan.

Ma’lumot uchun, “Taxtlar o‘yini” seriali Jorj Martinning “Muz va olov qo‘shig‘i” romani asosida suratga olingan. Uning birinchi fasli premyerasi 2011-yilning aprelida bo‘lib o‘tgan, oxirgi — sakkizinchi fasli esa 2019-yilning aprelida chiqdi. Serial Amerika televideniyesi tarixidagi eng qimmat loyihalardan biri bo‘ldi.

Avvalroq “Taxtlar o‘yini” yulduzi Emiliya Klark Marvel kinoolamining yangi superqahramoniga aylanishi ma’lum bo‘lgandi.