Sirdaryoda haydovchisi uxlab qolgan Matiz temir to‘siqqa urilishi oqibatida yo‘lovchi halok bo‘ldi

Sirdaryo viloyati Mirzaobod tumanida Matiz ishtirokida yo‘l-transport hodisasi sodir bo‘ldi, deya xabar qilmoqda YHXBB matbuot xizmati.

Qayd etilishicha, voqea 2021-yilning 3-oktabr kuni soat 04:50 larda Sirdaryo viloyati Mirzaobod tumani hududidan o‘tgan yo‘lda sodir bo‘lgan.

Ma’lum bo‘lishicha, haydovchi avtomobilda Termiz—Toshkent yo‘nalishi bo‘ylab harakatlanib kelayotgan vaqtda uxlab qolgan.

Oqibatda avtomashina yo‘lni ikkiga bo‘luvchi temir to‘siqqa urilib, undagi bir nafar yo‘lovchi voqea joyida vafot etgan.

Bundan avval Navoiyda tuyani urib yuborgan Spark Damas bilan to‘qnashuv sodir etgani, Sirdaryoda yuk mashinasiga borib urilgan “Jiguli” haydovchisi voqea joyida halok bo‘lgani hamda Qarshida sodir bo‘lgan YTHda 24 yoshli IIB xodimi vafot etgani haqida xabar berilgandi.