Namangandagi yashik tayyorlash bilan shug‘ullanadigan qishloq. Uning aholisi mahsulotlarini hatto xorijga ham yuboradi (foto va video)

Gurtepa Namangan viloyatining Mingbuloq tumanidagi eng qadimiy va eng katta qishloqlardan hisoblanadi. Bu haqda “Daryo” muxbiri Azizbek Abduvaliyev hikoya qilmoqda.

Tarixiy manbalarda qayd etilishicha, XX asr boshlarida qishloq gurkirab rivojlangan, “ming uyli” kichikroq shaharcha darajasiga yetgan. Aholisi esa savdogarlik va hunarmandchilik, xususan, bo‘z to‘qish bilan shug‘ullangan.

Keyinchalik Gurtepa yog‘och qutilar — yashik yasashga ixtisoslashdi. Hisob-kitoblarga ko‘ra, bugungi kunda qishloqda 200 ga yaqin katta-kichik korxona bo‘lib, ularda 2,5 mingdan ortiq odam yashik tayyorlash bilan band. Bu qishloq aholisining chorak qismi degani.

— 10 yildan beri shu ish bilan oilaviy shug‘ullanamiz, — deydi gurtepalik Karimjon Abdurahimov. — Qishloqdagi eng katta korxonalardan biri bizga tegishli. Kuniga taxminan 3 mingta yashik tayyorlanadi. Ularni O‘zbekiston bo‘ylab tarqatamiz, asosiy xaridorlar Oltiariq va Qo‘qondan. Hozir yaqin xorij — Tojikiston, Qirg‘iziston va Qozog‘istonga ham yuboryapmiz. Yashik meva saqlash uchun ishlatiladi. Masalan, hozirgi kuz mavsumida uzum va xurmo solish uchun olishyapti. Yashik uchun Kaliforniya teragi yog‘ochidan foydalanamiz. Yashigi oppoq, chiroyli chiqadi, stanokda ham qiynamaydi.

Karimjonning aytishicha, o‘lchami va ketadigan xomashyoga qarab yashiklarning narxlari farqlanadi. Eng arzoni pomidor uchun mo‘ljallangani — 3-4 ming so‘m, eng qimmati esa olmaniki — 20 ming so‘mgacha borishi mumkin. Uzum yashigi 5,5 ming, xurmoniki esa 6,5 ming so‘m.

— Gurtepada har ikki uyning birida yog‘ochga ishlov beradigan stanok bo‘lsa kerak. Bizning oilada uch aka-uka shu ish bilan shug‘ullanamiz. Kam bo‘lmayapmiz: hovli-joylar qildik, do‘kon qurdik, mashinalar oldik. Endigi niyatimiz ota-onamizni hajga jo‘natish, — deydi Karimjon.

Korxonada 20 nafardan ortiq odam ishlaydi. Erkaklar yog‘ochni qayta ishlash bilan band bo‘lsa, ayollar yashikka mix qoqish va tayyor holatga keltirish bilan ovora.

— Kuniga o‘rtacha 200 ta yashik tayyorlayman. Har biri uchun 400 so‘mdan berishadi. Shunda bir kunda 80 ming so‘m ishlab topish mumkin. Yashikka mix qoqish oson ish emas, boshida qo‘llarimga mix kirib ketgan, bolg‘ani urib olib, ko‘kartirib yurgan paytlarim bo‘lgan. Keyinchalik ko‘nikib, tajribam oshdi, hozir hatto ko‘zimni yumib ham tayyorlay olsam kerak. Uyda tikuvchilik bilan shug‘ullanaman, kelgusida tibbiyot kollejiga o‘qishga kirib, hamshira bo‘lish niyatim bor, — deydi korxona ishchisi Mahliyo Abdumutalova.

Mahliyoning “hozir ko‘zimni yumib ham tayyorlay olsam kerak” deganini dastlab mubolag‘aga yo‘ydik, lekin 18 yashar qahramonimiz bitta yashikni mixlab qo‘yishi uchun 20 soniya yetarli bo‘ldi. Bizga esa buning uchun 2 daqiqaga yaqin vaqt ketdi.

Gurtepaning salohiyatidan samarali foydalanish uchun yashikchilikka ixtisoslashgan kichik sanoat zonasi tashkil etishga qaror qilindi.

Qishloqning “Tegirmonboshi” mahallasida buning uchun 8 gektar yer maydoni ajratildi va qurilish ishlari boshlab yuborildi.

— Kichik sanoat zonasida 64 ta loyiha amalga oshirilishi va 50 milliard so‘mga yaqin mablag‘ yo‘naltirilishi rejalashtirilgan. Buning natijasida qishloqdagi bir necha yuz odamning bandligi ta’minlanadi. Bizning sektor hududida joylashgan va O‘zbekistonda yagona bo‘lgan mazkur kichik sanoat zonasi kelgusi yili Navro‘z bayrami arafasida foydalanishga topshiriladi, — deydi Mingbuloq tuman soliq inspeksiyasi bo‘lim boshlig‘i Doniyor Quliyev.

O‘zbekning to‘y-to‘noqlari, bayramlari ko‘p. Ularga yashiklarda meva-cheva xarid qilish odat tusiga kirgan. Endi bilib oldingiz, bu yashiklar Namanganning Gurtepasida tayyorlangan bo‘ladi...