Namangan shahrida sodir bo‘lgan yo‘l-transport hodisasi oqibatida voyaga yetmagan shaxs halok bo‘ldi. Bu haqda viloyat IIB axborot xizmati xabar berdi.

Ma’lum qilinishicha, 29-sentabr kuni soat 17:00 larda shaharning “Yakkasada” MFY hududida Yangiqo‘rg‘on tumanida yashovchi 34 yoshli fuqaro o‘zi ishlovchi MChJga tegishli Isuzu yuk avtomashinasini boshqarib borayotib, harakat xavfsizligini ta’minlay olmay, yo‘l chetida turgan piyodani urib yuborgan.

Jabrlanuvchi Chortoq tumanida ota-onasi qaramog‘ida yashagan 6 yoshli bola bo‘lib, u olgan tan jarohatlari oqibatida voqea joyida vafot etgan.

Holat bo‘yicha Namangan shahar IIO FMB huzuridagi Tergov bo‘limi tomonidan 29-sentabr kuni Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi bilan jinoyat ishi qo‘zg‘atilgan.

Avvalroq Toshkentda 4 nafar maktab o‘quvchisini Damas urib yuborgani, Surxondaryoda yo‘lni kesib o‘tayotgan 7 yoshli qizchani Nexia-3 turtib ketishi oqibatida jabrlanuvchi halok bo‘lgani to‘g‘risida xabar berilgandi.