Hyundai Motor kompaniyasi Germaniyada markaning kelajakdagi modellarida paydo bo‘lishi mumkin bo‘lgan noodatiy rul chambaragini patentladi. Rulning markazidan ekran o‘rin olgan bo‘lib, ixtirochilar uni yasashda “Formula-1” bolidlarining shturvallaridan ilhomlangan, deb xabar beradi Motor.

Foto: CarBuzz

Hyundai’ning patent hujjatida ta’kidlanishicha, displey haydovchi uchun xavfsizlik yostiqchasidan foydalanishda noqulaylik tug‘dirmaydi. Qurilma rulning turli qismlariga joylashtirilgan va mustaqil qotirish tizimiga ega, shu sababli eyrbeg to‘qnashuv vaqtida ekranga shikast yetkazmagan holda ochila oladi.

Koreyaliklar displey hisobiga rul funksionalligini kengaytirishga birinchi bor urinmayapti. 2019-yilning bahorida Hyundai tugmalarga ega ikkita sensorli rulni yaratgandi. U haydovchining xohishiga qarab sozlangan. Biroq displeylar u qadar katta va ko‘p ma’lumot sig‘dira olmas, faqatgina boshqaruv elementi vazifasini bajara olardi — xuddi zamonaviy multirullardagi oddiy tugmalar kabi.

Foto: Hyundai

Foto: Hyundai

Foto: Hyundai

Keyinroq Hyundai’ga qarashli korxona rul markazida to‘laqonli ekran joylashgan Genesis Mint konseptini taqdim etdi. U qurilmalar paneli va multimedia tizimi displeyi o‘rnini egallagan. Ekran yon tomonlarida joylashgan oltita alohida sensor panellari yordamida boshqarilgan.

Foto: Genesis

Foto: Genesis

Innovatsion rulga qaysi model ega bo‘lishi hozircha noma’lum. Aftidan, u Genesis yoki Hyundai’ning N lineykasidagi modellarga o‘rnatiladi.

Avvalroq Hyundai kompaniyasi Casper krossoverining tashqi ko‘rinishini oshkor etgani to‘g‘risida xabar berilgandi.