Toshkentda 20 yoshli haydovchi Damas’da 4 nafar maktab o‘quvchisini urib yubordi. Ulardan biri shifoxonaga olib ketilayotganda vafot etdi. Bu haqda poytaxt IIBB matbuot xizmati xabar berdi.

Ma’lum qilinishicha, voqea 2-oktabr kuni, taxminan, soat 15:00 da Yangihayot tumanidagi Chinor va Polvonyor ko‘chalari kesishmasida yuz bergan. 20 yoshli A.K. Damas’ni ishonchnoma asosida haydab ketayotganida boshqaruvni yo‘qotib, yo‘l chetida turgan voyaga yetmagan piyodalarni urib yuborib, Nexia bilan to‘qnashgan.

Oqibatda 10-sinf o‘quvchilari — 2005-yilda tug‘ilgan Gleb K., 2005-yilda tug‘ilgan Sarmat M. va 2006-yilda tug‘ilgan Temur X. badan shikastlari bilan shifoxonaga yetkazilgan. Ikkala avtomobil haydovchilar ham shifoxonaga yetkazilgan.

Yana bir piyoda — 10-sinf o‘quvchisi 2004-yilda tug‘ilgan Artyom Y. YTH oqibatida yetgan badan shikastlari tufayli shifoxonaga yetkazish davomida vafot etgan.

Xabarda aytilishicha, holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bo‘yicha jinoyat ishi qo‘zg‘atilgan. Tergov olib borilmoqda.