Shvetsiya—Shveysariya hamkorligidagi ABB injiniring kompaniyasi elektromobillar uchun mo‘ljallangan dunyodagi eng tezkor quvvatlash qurilmasini taqdim etdi. Terra 360 nomini olgan qurilmaning quvvati 360 kilovattni tashkil etadi. Unga to‘rttagacha avtomobil batareyalarini bir vaqtda ulash mumkin, u model turidan qat’i nazar, akkumulyatorni 15 daqiqa ichida to‘liq quvvatlantiradi, deb xabar beradi Motor.

Foto: ABB

Terra 360 har qanday elektrokarning batareyasini 100 kilometr masofaga harakatlanish uchun yetadigan quvvat bilan uch daqiqadan kamroq vaqt ichida to‘ldira oladi. ABB rejalariga ko‘ra, 2021-yil oxiriga qadar ilk o‘ta tezkor quvvatlantirish terminallari Yevropada, 2022-yilda esa AQSh, Lotin Amerikasi davlatlari va Osiyo—Tinch okeani mintaqasida paydo bo‘ladi.

ABB yoki Asea Brown Boveri avtomobillar batareyalarini quvvatlantirish bilan 2010-yildan beri shug‘ullanadi — o‘shandan buyon dunyoning 88 dan ortiq mamlakatiga 406 mingdan ortiq qurilma sotgan. ABB o‘z ixtirosini eng ilg‘or deb atamoqda, ammo 2019-yilda Repsol neft va gaz kompaniyasi Biskayya provinsiyasiga 400 kilovattli stansiyani o‘rnatgandi. Bu kabi terminal yordamida 10 daqiqa ichida elektrokar batareyasini to‘liq quvvatlantirish mumkin, ammo birorta seriyali elektrokar hozirga qadar bunday quvvatni ko‘tara olmaydi.

ABB’ning Terra 360 qurilmasi o‘z ko‘rsatkichlari bilan bugungi kundagi modellarga mos keladi. Masalan, Genesis GV60 elektorkari 350 kilovattni qabul qila oladi.