Xosep Gvardiola “Barselona” bosh murabbiyligida 2008-yildan 2012-yilga qadar faoliyat olib borgan. Qisqa muddat davomida 14 ta sovrin, shular ichida ko‘plab murabbiylar orzusi bo‘lgan “shalpangquloq” kubokni ikki marta qo‘lga kiritgan. Ikkala finalda ham (2009 va 2011) “Manchester Yunayted” taslim etilgan. 2011-yilgi final Angliyaning “Uembli” stadionida bo‘lib o‘tgandi. “Barselona” “Manchester Yunayted”ni 3:1 hisobida taslim etgan. Kataloniyaliklar safida Pedro, Messi va Vilya o‘z hisobiga gol yozdirib qo‘ygan bo‘lsa, Runi inglizlarning bitta goliga mualliflik qilgan. O‘sha finalda “Barselona” safida maydonga tushgan futbolchilar hozir nima ish bilan mashg‘ul? “Daryo” 2011-yilgi final qahramonlari haqida ma’lumot beradi.

Foto: Getty Images

Darvozabon

Viktor Valdes

Foto: Getty Images

Ispaniyalik posbon 2002-yil 1-sentabr “Atletiko Madrid”ga qarshi o‘yinda (2:2) “Barselona”dagi debyutini o‘tkazgan. O‘sha mavsumda yosh darvozabon La Ligada 14 o‘yin, YChLda esa 6 ta o‘yin o‘tkazadi. Kataloniyaliklar bosh murabbiyi Lui van Gal darvozabonga ishonch bildirmaydi va uni ikkinchi jamoaga jo‘natadi. Valdes o‘ziga nisbatan qilingan bu adolatsizlikdan jahli chiqadi va “Barselona”dan ketish haqida o‘ylay boshlaydi. Lekin mavsum oralig‘ida Lui van Gal iste’foga chiqariladi. Uning o‘rnini egallagan Radomir Antich yosh darvozabonni asosiy tarkibga qaytaradi. 2003/04-yilgi mavsumdan boshlab Viktor 1-raqamli darvozabonga aylanadi va 11 yil davomida asosiy tarkibdagi joyini hech kimga bermaydi. Lekin 2014-yilda kutilmaganda “Manchester Yunayted”ga o‘tib ketadi. U yerda ham “eski tanishi” Lui van Gal bilan kelishmovchilik sabab bor-yo‘g‘i ikkita o‘yinda maydonga tushadi. Angliyadan so‘ng Belgiyaning “Standard” jamoasiga o‘tgan Valdes 7 o‘yinda 12 ta golni o‘z darvozasidan olib chiqadi. 2016-yilda “Midlsbro”ga erkin agent sifatida o‘tadi. Bir yildan so‘ng, 2017-yil 17-avgustda Viktor Valdes faoliyatini yakunlaganini e’lon qiladi.

Hozirda Viktor Valdes “Barselona” akademiyasi darvozabonlari bilan ishlayapti. Xoan Laporta “Barsa” prezidenti bo‘lgach, 39 yoshli sobiq darvozabonni ham jamoaga qaytardi.

Himoyachilar

Dani Alves

Foto: Getty Images

O‘z vaqtida Dani Alves eng yaxshi o‘ng qanot himoyachilaridan biri edi. Undan tashqari futbol tarixidagi eng ko‘p sovrin qo‘lga kiritgan futbolchi (43 ta sovrin). 2016-yilda “Barselona”ni tark etib, “Yuventus”ga o‘tgan. Turindan so‘ng “PSJ” safida ikki mavsum o‘ynagan Alves bir muddat o‘z vatani Braziliyaning “San-Paulu” klubi sharafini himoya qildi. 2021-yilning 17-sentabrida Alves maosh bilan bog‘liq muammolar tufayli “San-Paulu” bilan shartnomani bekor qildi. Hozirda 38 yoshli futbolchi erkin agent maqomida.

Xerard Pike

Foto: Getty Images

“Prezident” (“Barselona” futbolchilari orasida laqabi shunday) Kataloniya jamoasining chin ma’nodagi sodiq futbolchisi. Pep Gvardiola topilmalaridan biri bo‘lgan Pike 2008-yilda asosiy tarkibdan joy oldi va shundan buyon hozirgacha asosiy tarkibdagi o‘rnini hech kimga bermay kelmoqda. Yaqindagina moliyaviy muammolar girdobiga tushib qolgan jamoa yangi futbolchilar bilan shartnoma imzolay olmay turganda, Xerard o‘z maoshi qisqarishiga rozi bo‘ldi. Pike intervyularida bitta gapni doim takrorlaydi: “Men faoliyatimni ‘Barselona’da yakunlayman”. Jamoaning sodiq futbolchisi “Barsa” safida 600 dan ziyod o‘yinda ishtirok etib, 50 dan ortiq gol muallifiga aylangan.

Xavyer Maskerano

Foto: Getty Images

2010-yilda “Liverpul”dan xarid qilingan Maskerano Serxio Busketsga yordamchi bo‘lishi ko‘zda tutilgandi. Ammo “Barsa” himoyasida yuzaga kelgan muammolar sabab Gvardiola Xavyerni tayanch zonasidan himoya markaziga o‘tkazadi. U yerda mustahkam o‘rnashib olgan Maskerano 2018-yilga qadar “Barselona” sharafini himoya qildi. 2017-yil 26-aprelda “Osasuna” darvozasiga kataloniyaliklar safidagi birinchi va yagona golini urdi.

“Barselona”dan keyin ikki yil Xitoyda to‘p surgan Maskerano 2019-yilda Braziliyaga qaytdi va 2020-yilning 16-noyabrida futbolchilik faoliyatini yakunlaganini e’lon qildi.

Erik Abidal

Foto: Getty Images

2011-yilgi chempionlikdan so‘ng Erik sog‘lig‘i bilan bog‘liq muammolarga duch keldi. 2013-yilda esa “Barselona”ni tark etib, “Monako” safiga borib qo‘shildi. Liga 1 jamoasida 9 ta o‘yin o‘tkazgan himoyachi 2014-yil 5-iyulda “Olimpiakos” futbolchisi sifatida tanishtiriladi. O‘sha yilning 14-dekabrida esa Abidal butsisini mixga ildi.

2017-yilda Erik “Barselona” elchisiga aylandi. 2018-yildan 2020-yilga qadar “Barselona” sport direktori lavozimida faoliyat olib borgan Abidal “Bavariya”dan uchralgan 2:8 hisobidagi mag‘lubiyat fonida jamoani tark etdi.

Yarim himoyachilar

Serxio Buskets

Foto: Getty Images

Pike singari Buskets ham 2008-yilda “Barselona”da debyut qilgan. Pep Gvardiola tajribali Yaya Turedan ko‘ra yosh Serxioga ishonch bildira boshladi. Buskets shundan buyon jamoaning asosiy tarkib futbolchisi hisoblanadi. Hozirgacha “Barselona” safida 600 dan ortiq o‘yinda ishtirok etgan ispaniyalik futbolchi jamoa afsonasiga aylanib ulgurdi. Maydon markazini Serxio Busketssiz tasavvur qilish qiyin.

Xavi

Foto: Getty Images

Xavi “Barselona” tarixidagi eng yaxshi futbolchilardan biri hisoblanadi. 2015-yilda “Barselona” bilan yana bir “shalpangquloq” kubokni qo‘lga kiritdi va jamoani tark etdi. Kataloniyaliklar safida 700 dan ortiq o‘yinda maydonga tushgan Xavi “egizagi” Inyesta bilan birga futbolni san’at darajasiga chiqara olgandi. Muxlislar uning o‘yinidan zavq olardi.

“Barselona”dan so‘ng Xavi Qatarning “As-Sadd” jamoasiga o‘tadi. Hozirgi kunda esa Ernandes “As-Sadd” bosh murabbiyi sifatida faoliyat olib boryapti. Yaqin orada Xavini “Barselona” bosh murabbiyligida ko‘rishimiz mumkin.

Andres Inyesta

Foto: Getty Images

Inyesta ham “Barselona” tarbiyalanuvchisi. 2002-yilda Kataloniya jamoasida debyutini nishonlagan bo‘lsa-da, 2004/05-yilgi mavsumdan asosiy tarkib futbolchisiga aylangan. Xavi ketganidan uch yil o‘tib, Andres ham “Barselona”ni tark etdi. Yaponiyaning “Vissel Kobe” jamoasiga o‘tgan futbolchi hozir ham o‘sha yerda to‘p surmoqda. Inyesta 37 yoshga kirgan bo‘lsa ham, faoliyatini yakunlash haqida o‘ylab ko‘rgani yo‘q.

Hujumchilar

Pedro

Foto: Getty Images

2011-yilgi final qahramonlaridan biri. Pedro 27-daqiqada Xavining uzatmasidan so‘ng hisobni ochgandi. Pedro ham “Barselona”da uzoq ushlanib qolmadi. 2015-yilda “Chelsi”ga yo‘l oldi. Londonliklar bilan 2017-yilda Angliya chempionligini qo‘lga kiritdi. “Chelsi”dagi besh yilidan so‘ng Pedro Italiyaning “Roma”siga borib qo‘shildi. 2021-yil 19-avgust kuni “Latsio” futbolchini o‘z safiga qo‘shib oldi.

David Vilya

Foto: Getty Images

2011-yilgi finaldagi yana bir gol muallifi. Triumfdan ikki yil o‘tib, Vilya “Barselona”ni tark etdi. Avvaliga “Atletiko”da, keyin Amerikaning “Nyu-York Siti”sida va Avstraliyaning “Melburn Siti”sida o‘ynagan David 2019-yildan 2020-yilga qadar Andres Inyesta bilan birga “Vissel Kobe” sharafini himoya qildi. Yaponiya jamoasi Vilyaning faoliyatida so‘nggi klub bo‘ldi. Ispaniyalik futbolchi “Vissel Kobe”da faoliyatini yakunladi.

Lionel Messi

Foto: Getty Images

“Barselona”ning haqiqiy afsonasi Lionel Messi “ko‘k-anorranglilar” tarbiyalanuvchisi hisoblanadi. U 2000-yildan beri klub tizimida harakat qiladi, 2003-yildan esa asosiy jamoada o‘ynaydi. U katalon klubi bilan Ispaniya chempionati (10), Ispaniya Kubogi va Superkubogi (7 tadan), Chempionlar Ligasi (4), Yevropa Superkubogi va klublar o‘rtasidagi Jahon chempionati (3 martadan) bosh sovrinlarini qo‘lga kiritgan. Leoning “ko‘k-anorranglilar” safida umumiy hisobda 778 ta o‘yin o‘tkazib, 672 ta gol va 305 ta golli uzatma amalga oshirgan. Uning jamoa bilan qo‘lga kiritgan sovrinlari soni esa 35 tani tashkil qiladi.

2021-yil 10-avgust kuni “PSJ” jamoasi Lionel Messini o‘z safiga qo‘shib oldi. Messi parijliklar safidagi debyut golini o‘zi uchun qadrli bo‘lgan sobiq ustozi Pep Gvardiolaning “Manchester Siti”siga urdi.

Zaxira futbolchilari

Karles Puyol

Foto: Getty Images

O‘sha paytdagi “Barselona”ning sardori bo‘lgan Puyol 2014-yilda faoliyatini tugatdi. Hozirda Karles Ispaniya televideniyesida ekspert sifatida chiqishlar qilib turadi. 2021-yilda “Barselona” rahbariyatiga qo‘shildi va xayriya loyihalarida ishtirok etadigan bo‘ldi.

Seydu Keyta

Foto: Getty Images

Gvardiola “Barselona” murabbiyiga aylangach, eng birinchi Keytani xarid qilishlarini so‘raydi. Malilik futbolchi “Barsa”da 4 yil o‘ynaydi. Pep bilan birgalikda, 2012-yilda jamoani tark etdi.

Uning so‘nggi klubi Qatarning “Al-Jayish”i bo‘lgandi, u 2017-yilda faoliyatini yakunlagan.

Ibrohim Afellay

Foto: Getty Images

Afellay “Barselona”ga “PSV”dan olib kelingan edi. Niderlandiyalik futbolchi asosiy tarkib futbolchisiga aylanolmadi. 2012-yilda “Shalke-04” futbolchini ijaraga oldi. Undan keyin “Olimpiakos”da o‘ynagan futbolchi 2015-yilda “Barselona” safiga qaytdi. Yangi mavsum boshlanmasdanoq “Barselona” futbolchini “Stok Siti”ga sotib yubordi. Angliyada 4 mavsum faoliyat olib borgan Afellay 49 ta o‘yinda 2 ta golga mualliflik qildi. 2019-yilda esa sobiq jamoasi “PSV”ga qaytdi.

2020-yil fevral oyida esa faoliyatini yakunladi.

Bosh murabbiy

Xosep Gvardiola

Foto: Getty Images

Gvardiola qisqa muddat “Barselona”ni boshqargan bo‘lsa ham, o‘z nomini o‘chmas qilib yozdira oldi. “Barsa”dan so‘ng “Bavariya”ni qabul qilib olgan murabbiy, nemis jamoasi bilan Germaniyada tengsiz bo‘ldi. Biroq Pep myunxenliklar bilan YChL sovrinini qo‘lga kirita olmadi. 2016-yilda “Manchester Siti” ispan mutaxassisini bosh murabbiy etib tayinladi. Pep Angliyada “Siti” bilan uch bor chempion bo‘lishga erishdi. 2020/21-yilgi mavsumda “shaharliklar”ni “shalpangquloq”qa juda yaqin olib keldi. Finalda Tomas Tuxelning “Chelsi”si ustunlik qildi. Gvardiola 2021/22-yilgi mavsumda ham “Manchester Siti” ustozi sifatida faoliyatini davom ettirmoqda. Uning asosiy maqsadi Chempionlar Ligasini qo‘lga kiritish.

Ma’ruf Ochilov tayyorladi