Surxondaryo viloyatidagi “Ayritom” chegara bojxona postida qo‘shni Afg‘onistondan jangovar o‘q-dori olib o‘tayotgan o‘zbekistonlik haydovchi ushlandi. Bu haqda “Daryo”ga Bojxona qo‘mitasi axborot xizmati bosh inspektori Husan Tangriyev xabar berdi.

Foto: “Daryo” / Dilruh Isomiddinova

Ta’kidlanishicha, “Ayritom” chegara bojxona postida bojxona organlari tomonidan kontrabanda predmetlarining noqonuniy aylanmasiga qarshi tadbir o‘tkazilgan.

Tadbir davomida qo‘shni Afg‘onistondan kirib kelgan o‘zbekistonlik fuqaro Q.H. boshqaruvidagi Cobalt belgilangan tartibda bojxona nazoratidan o‘tkazilganda, uning yukxonasidagi sumkada jangovar o‘q-dorilar turkumiga kiruvchi, otish uchun yaroqli bo‘lgan 1 dona 9 millimetrli “Parabellum” jangovar patron borligi aniqlangan.

Foto: Bojxona qo‘mitasi axborot xizmati

Ayni paytda holat yuzasidan jinoyat ishi qo‘zg‘atilib, tergovga qadar tekshiruv harakatlari olib borilmoqda.

Bundan avval Surxondaryo viloyatidagi “Sariosiyo” chegara postida O‘zbekistonga jangovar o‘q-dorilarni olib kirishga uringan shaxs ushlangandi.