O‘zbekistonda xorijiy davlatlar harbiy kadrlarini tayyorlash yo‘lga qo‘yiladi

Prezident Shavkat Mirziyoyevning 20-sentabrdagi “O‘zbekiston Respublikasi Mudofaa vazirligining oliy harbiy ta’lim muassasalarida xorijiy davlatlar harbiy kadrlarini tayyorlash va o‘qitish tizimini joriy etish chora-tadbirlari to‘g‘risida”gi PQ-5247-son qarori qabul qilindi, deb xabar beradi Norma.

Hujjatga asosan Mudofaa vazirligining oliy harbiy ta’lim muassasalarida (OHTM) xorijiy harbiy kadrlar bilan ishlash bo‘limlari tashkil etiladi.

Shuningdek, OHTMda xorijiy davlatlar harbiy kadrlarini tayyorlash va o‘qitish tartibi to‘g‘risidagi nizom tasdiqlangan. Unda ta’lim berish tartibi va uni moliyalashtirish, shuningdek, ta’lim olish davomida xorijiy harbiy kadrlarning huquq va majburiyatlari belgilangan.

OHTMda xorijiy davlatlar harbiy kadrlarining ta’lim olishi xorijiy davlatlarning rasmiy murojaatiga asosan Mudofaa vazirligi tomonidan Prezident huzuridagi Xavfsizlik kengashi bilan kelishilgan holda tashkil etiladi. U belgilangan tartibda tuziladigan ikki tomonlama xalqaro shartnomalarga muvofiq beg‘araz, imtiyozli hamda to‘lov asosida OHTMning kursantlari, tinglovchilari va doktorantlari uchun amalga oshiriladi.

OHTMda xorijiy harbiy kadrlar uchun yillik qabul kvotalari Prezident tomonidan belgilanadi. Xorijiy harbiy kadrlarga ta’lim berish:

• oliy harbiy ta’limning bakalavriat dasturi bo‘yicha kursantlar umumiy cheklangan shtat birliklaridan tashqari ajratiladigan qo‘shimcha kvotalar doirasida;
• magistratura, harbiy internatura, klinik ordinatura va doktorantura dasturi bo‘yicha OHTMga ajratilgan kvotalardan tashqari qo‘shimcha kvotalar doirasida amalga oshiriladi.
• OHTMga xorijiy harbiy kadrlar kirish imtihonlarisiz o‘qishga qabul qilinadi. Ta’lim berish oliy harbiy ta’limning ta’lim dasturlari bo‘yicha o‘zbek va rus tilida kunduzgi ta’lim shaklida amalga oshiriladi.

Xorijiy harbiy kadrlarga ta’lim berish quyidagicha amalga oshiriladi:

• oliy harbiy ta’limning bakalavriat dasturi bo‘yicha;
• oliy harbiy ta’lim darajasiga muvofiq keladigan oliy harbiy ta’limning magistratura, harbiy internatura, klinik ordinatura dasturi bo‘yicha;
• magistratura oliy harbiy ta’lim darajasiga muvofiq keladigan oliy harbiy ta’limning operativ-strategik darajasi dasturi bo‘yicha;
• oliy ta’limdan keyingi ta’lim darajasiga muvofiq keluvchi doktorantura dasturi bo‘yicha;
• tayyorgarlik kurslarining yakka ta’lim va fakultativ dasturlari asosida;
• qo‘shimcha kasbiy dasturlar bo‘yicha.

Quyidagilarni tugatgan xorijiy harbiy kadrlarga:

• talab etilgan hajmdagi ta’lim dasturlarini o‘zlashtirgan xorijiy harbiy kadrlarga dastlabki leytenant harbiy unvoni, mutaxassisligi bo‘yicha toifa beriladi, belgilangan namunadagi diplom va ko‘krak nishoni taqdim etiladi;
• Qurolli Kuchlar Harbiy tibbiyot akademiyasining bakalavriat bosqichini tamomlagan xorijiy harbiy kadrlarga dastlabki tibbiy xizmat leytenanti harbiy unvoni va harbiy vrach mutaxassisligini beradigan davlat namunasidagi diplom va ko‘krak nishonlari taqdim etiladi, harbiy internaturani tamomlagach, navbatdagi tibbiy xizmat katta leytenanti harbiy unvoni va tegishli mutaxassisligi bo‘yicha guvohnoma beriladi;
• oliy harbiy ta’limning magistratura darajasiga muvofiq keladigan oliy harbiy ta’lim (operativ-taktik, operativ-strategik darajasi) dasturi bo‘yicha talab etilgan hajmdagi ta’lim dasturlarini o‘zlashtirgan xorijiy harbiy kadrlarga tegishli magistr darajasi hamda belgilangan davlat namunasidagi diplom va ko‘krak nishonlari taqdim etiladi;
• oliy ta’limdan keyingi ta’lim darajasiga muvofiq keladigan doktorantura dasturini tugatgan va belgilangan tartibda dissertatsiya himoya qilgan xorijiy harbiy kadrlarga tegishli fanlar bo‘yicha falsafa doktori (PhD) ilmiy darajasi beriladi;
• qisqa muddatli kurslarni tamomlagan xorijiy harbiy kadrlarga belgilangan namunadagi guvohnomalar (sertifikatlar) beriladi.

Hujjat Qonun hujjatlari ma’lumotlari milliy bazasida e’lon qilingan va 2021-yil 20-sentabrdan kuchga kirdi.

Avvalroq Milliy gvardiya Harbiy-texnik instituti Jamoat xavfsizligi universiteti etib qayta tashkil etilgani, O‘zbekiston IIV akademiyasida bakalavriat va magistratura ta’lim tizimi joriy etilishi, Prezident O‘zbekistonda Harbiy tibbiyot akademiyasini tashkil etish to‘g‘risidagi qarorni imzolagani haqida xabar berilgandi.