Tashqi mehnat migratsiyasi agentligi joriy hafta davomida Rossiya va Ukrainada murakkab moliyaviy ahvolda qolgan va mehnat qobiliyatini yo‘qotgan 6 nafar fuqaroni konsullik idoralari ko‘magida O‘zbekistonga qaytardi. Bu haqda agentlik matbuot xizmati xabar berdi.
Ulardan biri samarqandlik A.Q. bo‘lib, 2020-yil mart oyida Rossiyaning Tomsk shahriga ishlash maqsadida borib, salomatligi yomonlashgani sababli mehnat qobiliyatini yo‘qotgan. Ushbu fuqaro agentlik tashabbusi va homiylar ko‘magida davolanish bilan bog‘liq xarajati, oziq-ovqat va vaqtinchalik yashash joyi bilan ta’minlangan. Shuningdek, Xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan 22-sentabr kuni Novosibirsk—Toshkent yo‘nalishida vatanga qaytarilgan.
Navbatdagi fuqaro 59 yoshli farg‘onalik U.Yu. 2021-yilning avgust oyida ishlash maqsadida Rossiyaga borib, sog‘ligi yomonlashgan va mehnat qobiliyatini yo‘qotgan. Agentlik tomonidan homiylar jalb qilinib, 24-sentabr kuni Sankt—Peterburg—Farg‘ona yo‘nalishida O‘zbekistonga qaytib kelgan.
Asli Namangan viloyatidan bo‘lgan A.I. shu yili Novosibirsk shahridagi qurilish obyektida ishlash maqsadida borib, kasallikka uchrab, ishsiz qolgan. Xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan agentlik ko‘magida Novosibirsk—Toshkent yo‘nalishidagi aviareys bilan vatanga qaytarilgan.
Andijonlik J.T. ham 2019-yilda qurilish sohasida ishlash maqsadida Novosibirsk shahriga borib, muqim ish joylarida ishlolmagani sababli moliyaviy qiyin ahvolda qolgan. Fuqaroga agentlik ko‘magida homiylar jalb qilingan holda Novosibirsk—Andijon yo‘nalishidagi aviareys bilan O‘zbekistonga qaytish uchun avia chipta tashkil qilingan.
Novosibirskda sog‘ligi yomonlashishi natijasida moliyaviy qiyin ahvolda qolgan yana bir fuqaro navoiylik 51 yoshli I.P.ga agentlik tashabbusi bilan saxiy insonlar ko‘magida vatanga qaytishiga amaliy yordam ko‘rsatilgan.
Qashqadaryolik M.M. 2021-yilda ijtimoiy tarmoqdagi e’lon asosida Ukrainaning Kiyev shahriga borib, taklif etilgan kompaniya bilan kelisholmay moliyaviy qiyin ahvolda qoladi. O‘zbekistonning Ukranidagi Bosh konsulxonasi bilan hamkorlikda 22-sentabr kuni Kiyev—Toshkent yo‘nalishidagi aviareys orqali O‘zbekistonga qaytishiga ko‘maklashilgan.
Avvalroq Rossiyadagi korxona ichkilikka berilgan 47 nafar o‘zbekistonlik migrant bilan mehnat shartnomasini bekor qilib, vatanga qaytarib yuborgani haqida xabar berilgan edi.
Izoh (0)