Respublika bolalar tayanch-harakat tizimi kasalliklari reabilitatsiya markazida Davlat xavfsizlik xizmati tomonidan xayriya tadbiri o‘tkazildi. Bu kabi tadbirlar idora tomonidan butun mamlakat bo‘ylab o‘tkazilmoqda.
DXX matbuot xizmatidan ma’lum qilishlaricha, xavfsizlik xizmati tashkil etilganining 30 yilligi munosabati bilan idora tomonidan mamlakat bo‘ylab kam ta’minlangan oilalarning farzandlari uchun, shuningdek, maktablar va mehribonlik uylarida tantanali dasturlar tashkil etilib, bayram dasturxonlari yozilmoqda, esdalik sovg‘alari ulashilmoqda.
Respublika bolalar tayanch-harakat tizimi kasalliklari reabilitatsiya markazi mutassaddilari xasta bolalarga bir olam quvonch ulashgan tashkilotchilarga minnatdorchilik bildirib, markaz bemorlarining ruhan tetiklashib, yanada tezroq davo topishida bu kabi tadbirlarning alohida o‘rni borligini ta’kidlab o‘tdi.
Respublikada yagona hisoblangan va 100 o‘ringa mo‘ljallangan mazkur markazda ortopediya va nevrologiya bo‘limlari mavjud bo‘lib, bu yerda nogironligi bo‘lgan 3 yoshdan 18 yoshgacha bo‘lgan bolalar va o‘smirlar uzoq muddatli reabilitatsiya jarayonlaridan o‘tib, davolanadi.
“Davolash xarajatlari va dori-darmonlar davlat tomonidan ta’minlanadi. Barcha sharoitlarimiz mavjud”, — deydi markazning davolash ishlari bo‘yicha direktor o‘rinbosari Gulnora Fayziyeva.
Izoh (0)