Yanvar oyida, AQSh prezidenti Jo Baydenning inauguratsiyasidan so‘ng, Germaniya kansleri Angela Merkel u bilan telefonda muloqot qilish taklifini rad etgan. Bu haqda The Wall Street Journal voqeadan xabardor manbalarga tayanib yozdi. Ushbu qo‘ng‘iroq Baydenning lavozimiga kirishgandan keyin chet el rahbari bilan birinchi telefon suhbati bo‘lishi kerak edi.

Foto: Getty Images

Merkelga Bayden bilan suhbatlashish taklifi juma kuni kech tushganda berilgan, shuning uchun u taklifni rad etgan. O‘sha paytda kansler odatda dam olish kunlarini o‘tkazadigan shahar tashqarisidagi uyida edi, deydi nashr suhbatdoshlari. WSJ yozishicha, Merkelning yordamchilari  uning e’tiborini qo‘ng‘iroqning ramziy ahamiyatiga qaratgan, lekin u buni noo‘rin deb hisoblab, suhbatni boshqa kunga belgilashni so‘ragan.

Bayden lavozimga kirishganidan keyin gaplashmoqchi bo‘lgan birinchi xorijiy rahbar sifatida Merkelning tanlanishi, Yevropa bilan aloqalar zaiflashgan Donald Tramp prezidentligi davridan keyin “transatlantik sheriklikka qaytish” ramzi bo‘lishi kerak edi, deb yozadi WSJ Amerika prezidentining yordamchilariga tayanib.

Jo Baydenning inauguratsiyasi 20-yanvarda bo‘lib o‘tgandi. Vazifasiga kirishgach u Donald Trampning bir qator farmonlarini, jumladan, Kanadadan AQShgacha cho‘zilishi rejalashtirilgan Keystone XL quvurini qurishga berilgan ruxsatni bekor qildi. Bayden chet el rahbari bilan birinchi telefon suhbatini 23-yanvar kuni o‘tkazdi. Uning birinchi suhbatdoshi Kanada bosh vaziri Jastin Tryudo bo‘ldi. Ular Baydenning Keystone XL qurilishini bekor qilish haqidagi qarorini muhokama qildi.

Merkel va Bayden 25-yanvarga kelibgina telefon orqali gaplashdi. Ular koronavirus pandemiyasiga qarshi xalqaro chora-tadbirlarni muhokama qildi. Angela Merkel Yevropa va transatlantik sheriklar o‘rtasidagi hamkorlikni tiklash mas’uliyatini o‘z zimmasiga olish istagini bildirgan.

15-iyul kuni esa Jo Bayden va Angela Merkel Oq uyda uchrashib, AQSh va Germaniya o‘rtasidagi sheriklik tamoyillari, demokratik qadriyatlar va Yevropa yaxlitligini himoya qilish bo‘yicha Vashington deklaratsiyasini qabul qildi.