British Airways’ning yo‘lovchisi vafot etgani uchun Toshkentga qo‘nishga majbur bo‘lgan samolyotida nosozlik aniqlangani, layner vaqtincha aeroportda qolgani to‘g‘risida xabar berilgandi. Telegram’dagi “Novosti Tashkentskogo neba” kanalining yozishicha, 23-sentabr kuni aviakompaniya o‘z yo‘lovchilarini Toshkentdan olib ketgan.
“Britaniya aviakompaniyasi laynerining ekipaji yo‘lovchilardan biri o‘zini yomon his qilgani sabab Toshkentga favqulodda qo‘nishni amalga oshirgan, shuningdek, bortning texnik nosozligi sabab aeroportda qolgan BA-260 reysi yo‘lovchilarini olib ketish uchun London—Toshkent—London marshruti bo‘yicha qo‘shimcha BA-9154/BA-260 reysini amalga oshirdi”, — deyiladi xabarda.
22-sentabr kuni ushbu reysdagi 83 yoshli yo‘lovchi ayol o‘zini yomon his qilgan. Samolyot Toshkentga yetib kelganida ayol vafot etgan. Barcha yo‘lovchilar samolyotdan tushirilib, Toshkent aeroporti hududiga joylashtirilgan. Samolyotga yoqilg‘i quyilgandan so‘ng, yonilg‘i nasosi ishlamay qolgan. British Airways bortida texnik xodimlar yo‘q bo‘lgan, Uzbekistan Airways Technics muhandislik xodimlari esa B777 samolyotlariga texnik xizmat ko‘rsatish litsenziyasiga ega bo‘lmagan.
Shunga qaramay, Buyuk Britaniya Aviatsiya boshqarmasi zarur ishlarni bajarish va parvozlar jurnalini tuzish uchun bir martalik ruxsatnoma bergan. Shundan so‘ng Uzbekistan Airways Technics tomonidan B757 / B767 / B787 samolyotlarida ishlash bo‘yicha katta tajribaga ega bo‘lgan muhandis ajratilgan. Taqdim etilgan hujjatlarni tekshirilgandan so‘ng, ta’mirlash ishiga ruxsatnoma oldi. Tegishli ishlar yakunlangach, samolyot foydalanishga topshirilgan. Biroq xabarda aytilishicha, ekipajning ish vaqti tugagani sababli samolyot ucha olmadi va ekipaj dam olguncha Toshkent aeroportida qolgan.
Izoh (0)