Respublika “Ijtimoiy fikr” jamoatchilik fikrini o‘rganish markazi 24-oktabr kuni bo‘lib o‘tadigan prezident saylovlari bo‘yicha telefon orqali so‘rovning to‘rtinchi bosqichi natijalarini e’lon qildi. So‘rov 30-avgustdan 10-sentabrgacha o‘tkazilgan bo‘lib, unda respublikaning barcha hududlari aholisi qatnashgan.
Telefon so‘rovlari natijalari monitoringining ko‘rsatishicha, Prezident saylovi fuqarolarning mamlakat ijtimoiy-siyosiy hayotiga integratsiyalashuvi darajasini oshirishga xizmat qiladi.
“Siz mamlakatning ijtimoiy-siyosiy va ijtimoiy-iqtisodiy hayotini kuzatib borasizmi?” degan savolga aksariyat fuqarolar ijobiy javob bergan, shulardan 47,9 foiz respondentlar mamlakatda kechayotgan ijtimoiy-siyosiy jarayonlar bilan doimiy ravishda, 40,2 foizi so‘ralganlar esa vaqti-vaqti bilan qiziqishini ma’lum qilgan.
Tadqiqotni o‘tkazish vaqtida 91,8 foiz o‘zbekistonliklar Prezident saylovlari bo‘lib o‘tishidan xabardor bo‘lgan. So‘rov natijalarining tahlili saylovoldi kampaniyasining borishini so‘ralganlarning yarmidan sal ko‘prog‘i — 60,5 foiz kuzatib borishlarini ko‘rsatgan.
So‘rovlar davomida aniqlanishicha, 71,2 foiz respondentlar uchun saylovoldi kampaniyasining borishi va bo‘lajak saylovda ovoz berishga tayyorgarlik haqidagi axborotning eng ommabop manbasi O‘zbekiston davlat televideniyesi hisoblanadi. Ushbu reytingda internet ikkinchi o‘rinni egallagan, 46,5 foiz so‘rov ishtirokchilari bo‘lajak saylov yangiliklari bilan internet orqali tanishgan. 32,8 foiz respondentlar uchun saylovoldi kampaniyasining borishi haqidagi asosiy axborot manbasi mamlakat nodavlat televideniyesi kanallari hisoblanadi.
So‘rov natijalari tahlilining ko‘rsatishicha, jamoatchilik fikrida saylovoldi jarayonining bevosita ishtirokchilari o‘rtasidagi ochiq telemunozaralar prezidentlikka nomzodlarning siyosiy dasturlari haqida ma’lumot olishning eng jozibali shakli hisoblanadi. Ushbu fikrga telefon so‘rovining 46,5 foiz ishtirokchilari qo‘shilgan 21,7 foiz respondentlar nomzodlarning ishonchli vakillari ishtirokidagi tok-shoularga qiziqish bildirgan. So‘rov ishtirokchilari ularga mustaqil ekspertlar, olimlar, tahlilchilarning bo‘lajak siyosiy voqea hamda nomzodlar va ularning siyosiy ustuvorliklari haqidagi fikrlari, shuningdek, nomzodlarning saylovchilar bilan bevosita uchrashuvlari qiziqarli ekanini ta’kidlagan.
Shu bilan birga, so‘rov ishtirokchilari tadqiqot davomida nomzodlarning saylovoldi dasturlari bilan to‘liq tanishishga hali ulgurmagani, ularning dasturiy maqsad va vazifalari haqida faqat umumiy tasavvurga ega ekanini ta’kidlagan.
Qayd etilishicha, telefon so‘rovi aholining yuqori elektoral faolligini aniqlagan, saylash huquqiga ega bo‘lgan ko‘pchilik o‘zbekistonliklar, o‘zlarining shaxsan ta’kidlashlaricha, O‘zbekiston prezidentligiga bo‘lajak saylovda, albatta, ishtirok etadi.
Eslatib o‘tamiz, “Ijtimoiy fikr”ning 2016-yilgi so‘rovida qatnashganlarning 97,5 foizi Prezident saylovida ishtirok etishini ma’lum qilgandi.
Izoh (0)