Madaniyat va san’atni rivojlantirish jamg‘armasi Toshkentdagi Romanovlar saroyi binosini rekonstruksiya qilish loyihasini amalga oshirishni rejalashtirmoqda. Bu haqda jamg‘arma matbuot xizmati “Daryo”ga ma’lum qildi.
Qayd etilishicha, Vazirlar Mahkamasining qaroriga asosan 2019-yilda Madaniyat va san’atni rivojlantirish jamg‘armasi Romanovning sobiq qarorgohini rekonstruksiya qilish va Davlat san’at muzeyi filiali binosiga joylashtirish bo‘yicha me’moriy loyihani ishlab chiqishni boshladi.
Hozirgi vaqtda dastlabki konsepsiya tayyor va u ekspozitsiya rejasi, bino qanoti uchun me’moriy va rejalashtirish yechimi, yuz yillik daraxtlarni saqlagan holda qo‘shimcha yashil maydonlarni ekish va mavjud favvoralarni tiklash bo‘yicha ishlab chiqilgan landshaft dizayni va texnik ishlanmalarni o‘z ichiga oladi. Konsepsiyaning asosiy g‘oyasi — jamoatchilik uchun ochiq maydon yaratish. Tashrif buyuruvchilar nafaqat muzey mehmoni bo‘lishlari, balki saroyning bog‘ hududida ham vaqt o‘tkazishlari mumkin.
Saroyni qayta tiklash loyihasida o‘zbekistonlik mutaxassislar bilan birgalikda ishlaydigan Ateliyer Brückner GmbH kompaniyasi mutaxassislari jalb qilingan. Germaniya kompaniyasi murakkab ko‘rgazma loyihalari va doimiy muzey ekspozitsiyalari uchun arxitektura maydonlari konsepsiyalari va dizaynini ishlab chiqishga ixtisoslashgan.
Ateliyer Brückner GmbH’ning muvaffaqiyatli bajarilgan loyihalari orasidan Myunxendagi BMW muzeyi (2008), Bryusseldagi “Bu Opera” (That’s Opera) ko‘rgazmasi (2008), Augsburgdagi To‘qimachilik sanoati muzeyi (2010), Amsterdamdagi Milliy dengiz muzeyi (2011), Hemnitzdagi Davlat arxeologiya muzeyi (2015), Seuldagi Hyundai MotorStudio (2017) va Gizadagi Buyuk Misr muzeyi (2018) o‘rin olgan.
2018-yilda Bryukner atelesi Svikkau shahridagi Avgust Xorx muzeyi me’moriy yechimi uchun Arxitektura forumi mukofotiga sazovor bo‘lgan. 2017-yilda Jenevadagi Etnografiya muzeyi ekspozitsiyalarini loyihalashtirgani uchun — har yili bo‘lib o‘tadigan “Yevropa yil muzeyi” mukofotini qo‘lga kiritdi. 2016-yilda — Kopengagendagi (Den Bla Planet) Daniya Milliy okeanariumi rekonstruksiyasi uchun 12 ta xalqaro mukofot sohibi bo‘ldi.
Knyaz Nikolay Konstantinovichning saroyi 1891-yilda me’morlar Vilgelm Geynselman va Aleksey Benua tomonidan qurilgan. Ikki qavatli bu bino kulrang-sariq rangli pishgan g‘ishtdan ishlangan va murakkab hajmli va keng maydonli dizayn yechimiga ega. Saroy fasadlari nafis to‘rli panjaralar, derazalar va dekorativ kichik minoralar bilan bezatilgan. Kirish eshigi zinapoyaning har ikki tomonidan sof o‘lchamdagi it haykallari bilan qo‘riqlanadi, poydevorlarda bronza kiyiklar joylashgan.
1935-yilda bino Lenin nomidagi Pionerlar saroyi bo‘lgan. 1980-yillarda u qimmatbaho buyumlar kolleksiyasi namoyish etiladigan muzeyga aylandi. Mustaqillik davridan boshlab, bino O‘zbekiston Tashqi ishlar vazirligining Qabul uyi sifatida xizmat qilgan.
2020-yilda binoning holati qandayligini aniqlash maqsadida fond arxivlangan ma’lumotlarni batafsil o‘rganib chiqdi. Tahlil davomida bino arxitekturasining aksar qismi asl tuzilishini saqlab qolganligi aniqlandi. Keyinchalik tarixiy obyekt konstruksiyasining barqarorligini aniqlash uchun texnik tekshiruv o‘tkazildi.
Yangi filialda keyingi ekspozitsiyalarni joylashtirish uchun ekspertlar O‘zbekiston Davlat san’at muzeyi fondidan yig‘ilgan san’at asarlari kolleksiyasini alohida o‘rganib chiqdi. Bir vaqtlar saroyni bezab turgan marmar va bronzadan yasalgan haykallarga qo‘shimcha ravishda, G‘arbiy Yevropaning rassomchilik kolleksiyasi, chinni buyumlar, interyer buyumlari va boshqa qimmatli san’at asarlarini muzeyga qaytarish rejalashtirilgan.
Izoh (0)