“Maroqand neft bazasi” MChJ va uning filiallarida korrupsiya va talon-torojga qarshi profilaktik tadbir o‘tkazildi. O‘rganish davomida jamiyatning mas’ul mansabdor shaxslari tomonidan yuklatilgan vazifalar lozim darajada bajarilmagani, moliyaviy qonunchilikka rioya etilmasligi hamda tashkilotning moliyaviy holatiga befarqligi oqibatida jiddiy moliyaviy xato va kamchiliklarga yo‘l qo‘yilgani aniqlandi.
Jumladan, neft bazasi va uning filiallariga “Buxoro neftni qayta ishlash zavodi” tomonidan vaqtinchalik mas’ul saqlashga topshirilgan jami 23 milliard 339 million so‘mlik 3219 tonna avtobenzin belgilangan tartibda birja savdolari orqali sotib olinmasdan, iste’molchilarga yuklab jo‘natib yuborilgan.
Buning oqibatida yuzaga kelgan narx tafovutlari orqali neft bazasiga jami 2 milliard 666 million so‘mlik zarar yetkazilgan. Shuningdek, tovar-moddiy qiymatliklar, asosiy vositalar va neft mahsulotlaridan jami 844,5 million so‘m miqdorida kamomadlar aniqlandi.
Ta’kidlash joizki, ayrim mas’ullar tomonidan neft mahsulotlarining hisobini yuritish uchun mo‘ljallangan yoqilg‘i sig‘imlarining kalibrovka jadvallari atayin o‘zgartirilib, kamomadlar yashirib kelingan.
Jumladan, Bulung‘ur filialining mas’ullari tomonidan 2020-yil 15-avgustdan 2021-yil 31-iyulgacha bo‘lgan davrdagi 2000 kub metr sig‘imda saqlanib kelayotgan Ai-80 K2-L avtobenzin mahsuloti o‘lchash jarayonlarida mahsulotning ma’lum balandligi (sm) bo‘yicha hajm (litr) qoldiqlari noto‘g‘ri ko‘rsatilib kelingani oqibatida hisobot davri yakunlariga ko‘ra o‘tkazib kelingan xatlovlar xatolik bilan o‘tkazilgan, oqibatda 145 785 litrdan 750 918 litrgacha nomutanosibliklar xatlovlarda yashirib kelingan.
Neft mahsulotlarining saqlanishi bo‘yicha o‘tkazilgan o‘rganishlarda neft bazaning Bulung‘ur filialida olib borilgan xatlovlar natijasida 308,6 million so‘mlik 41 296 litr Ai-80 K2-L avtobenzini ortiqcha ekani aniqlangan.
Bundan tashqari, neft mahsulotlarini asossiz ravishda hisobdan chiqarish va ish haqidan bo‘lgan qarzdorliklar bo‘yicha jami 453,4 million so‘m miqdorida moliyaviy xato-kamchiliklar aniqlangan.
Jamiyat filiallari avtoxo‘jaligining mexaniklari va haydovchilari tomonidan jami 148,6 million so‘mlik 24 223 litr neft mahsulotlari asossiz ravishda hisobdan chiqarilgan. Masalan, jamiyat avtoxo‘jaligi mexanigi va haydovchilari o‘rtasidagi kelishuv natijasida aslida gaz yoqilg‘isi bilan harakatlanishda bo‘lgan yuk avtomashinasiga haqiqatda bajarilmagan qatnovlar bo‘yicha yo‘l varaqalari rasmiylashtirilib, jami 18 933 litr 117,1 million so‘mlik benzin yoqilg‘isi mahsuloti noqonuniy hisobdan chiqarilgan.
Jamiyat va uning filiallarining qarzi 2021-yilning 1-sentabr holatiga ko‘ra 33 milliard 384 million so‘m bo‘lib, shundan muddati o‘tib ketgan debitorlik qarzdorligi 19 milliard 843 million so‘mni hamda bugungi kunda undirish “umidsiz” (korxonalar yopilishi, da’vo muddatlarining o‘tishi va hokazo) bo‘lgan qarzdorlik summasi 14 milliard 234 million so‘mni tashkil etmoqda.
Aniqlangan holatlarga huquqiy baho berish maqsadida ma’lumotlar huquqni muhofaza qiluvchi idoralarga taqdim etilgan.
O‘tkazilgan o‘rganishlar aniqlangan xato-kamchiliklarni bartaraf etish, ularning kelgusida yo‘l qo‘yilishining oldini olish maqsadida “O‘zbekneftgaz” AJning tegishli departamentlari va neft baza jamoasi ishtirokida “Maroqand neft bazasi” MChJda kengaytirilgan yig‘ilish o‘tkazildi.
Yig‘ilish davomida kamchiliklarga yo‘l qo‘ygan “Maroqand neft bazasi” MChJning jami 11 nafar mas’ul mansabdor shaxsi bilan tuzilgan mehnat shartnomalari bekor qilindi, 6 nafar xodimga nisbatan intizomiy jazo choralari qo‘llanildi.
Izoh (0)