Qozog‘istonda 34 yillik “Jiguli” yangi Mercedes-Benz GLA narxida sotuvga qo‘yildi (foto)

“Auto.ru” saytida 34 yil davomida 754 kilometr yo‘l bosgan ideal holatdagi “Jiguli” sotuvga qo‘yilgani to‘g‘risida e’lon paydo bo‘ldi. “VAZ-2106”ning olmaotalik egasi sarg‘ich sedan uchun 3,8 million rubl (52 ming dollar) so‘ramoqda. Bu kabi yuqori narx mashinaning ajoyib holatdaligi va zavoddagi plombalari saqlanib qolgani bilan izohlanmoqda. Taqqoslash uchun bu pulga Rossiyada 150 ot kuchiga ega Progressive jamlanmasidagi yangi Mercedes-Benz GLA 200 4Matic’ni xarid qilish mumkin, deb xabar beradi Motor.

“Jiguli”ning yaxshi holatda ekanini e’lon qilingan suratlar tasdiqlaydi — aftidan, SSSR davrida sedan hatto sotuvdan oldingi tayyorgarlik jarayonlaridan ham o‘tmagan. Old o‘rindiqlarida polietilen qoplamalar saqlanib qolgan, zaxira qismlari esa sovet gazetalariga o‘ralgan. Kuzov va salonning holati mashina quruq gajarda saqlanganidan dalolat beradi.

1987-yildan buyon “VAZ-2106”ga bir kishi egalik qilib kelgan va u qandaydir sabablarga ko‘ra, mashinadan foydalanmagan. Orqali ko‘rishga mo‘ljallangan oynalarning yo‘qligi, shuningdek, yukxona tepasidagi plombaning mavjudligi mashina juda kam masofa bosganini tasdiqlaydi.

“VAZ-2106” kapoti ostidan 1,5 litrli benzin karbyutayorlari dvigatel o‘rin olgan bo‘lib, u 4 pog‘onali mexanik uzatmalar qutisi yordamida boshqariladi. 1980-yillarning ikkinchi yarmida ham “VAZ-2106” yetarli darajada qimmat bo‘lgan — 1986-yilda modelning tavsiyaviy narxi 9100 sovet rublini tashkil etgan.

Avvalroq Rossiyada 37 yillik “Jiguli” ikkita yangi Mercedes-Benz E-klass narxida sotuvga qo‘yilgani, Peterburgda 22 yil garajda saqlangan yangi “VAZ-2104” topilgani, Rossiyada zavod plombalari olinmagan 26 yillik “Jiguli” yangi BMW X3 narxida sotuvga qo‘yilgani to‘g‘risida xabar berilgandi.