Xorazmda “Xalq so‘zi” gazetasi jurnalisti Said Mahsumov avtohalokatga uchrab, halok bo‘lgani haqida xabar berilgan edi. YHXBB matbuot xizmati ushbu YTH haqida ma’lumot berdi.
Unga ko‘ra, voqea 19-sentabr kuni soat 23:35 larda Xorazm viloyati, Tuproqqal’a tumani, Sarimoy qishlog‘i hududidan o‘tgan A-380 G‘uzor—Buxoro—Nukus—Beyneu xalqaro ahamiyatga ega bo‘lgan avtomobil yo‘lining 493-kilometrida yuz bergan. Uch yo‘lovchi bo‘lgan Tacuma rusumli mashina Isuzu yuk mashinasiga to‘qnashgan.
Oqibatda Tacuma haydovchisi A.M. hodisa joyida, ushbu avtomobil yo‘lovchilari S.M. shifoxonaga olib ketilayotganda, R.J. va A.Q. esa shifoxonada vafot etgan.
Qayd etilishicha, mazkur YTH yuzasidan Tuproqqal’a tumani IIB huzuridagi TB tomonidan Jinoyat kodeksining 266-moddasi 3-qismi “a” bandi (transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lishi) bilan jinoyat ishi qo‘zg‘atilib, hozirda dastlabki tergov harakatlari olib borilmoqda.
Izoh: Xabarning dastlabki tahririda Tuproqqal’a Qoraqalpog‘istondagi tuman sifatida ko‘rsatilgan edi. Bu xato — mazkur tuman Xorazm viloyatida joylashgan. Xatolik sabab yetkazilgan noqulayliklar uchun uzr so‘raymiz.
Izoh (0)