Toshkent—O‘sh yo‘lida Lacetti haydovchisi Howo yuk mashinasini o‘tkazib yubormagani oqibatida unga to‘qnashib, vafot etdi. Bu haqda Namangan viloyati IIB matbuot xizmati xabar berdi.
Ma’lum qilinishicha, voqea 17-sentabr kuni soat 02:30 larda Toshkent—O‘sh yo‘lining 286-kilometrida yuz bergan. 1988-yilda tug‘ilgan fuqaro Lacetti avtomashinasini ikkinchi darajali yo‘lda boshqarib borayotib, asosiy yo‘lda harakatlanib kelayotgan Howo yuk mashinasini o‘tkazib yubormasdan harakatlangani oqibatida to‘qnashuv sodir etgan.
Oqibatda Lacetti rusumli avtomashina haydovchisi olgan og‘ir tan jarohati oqibatida shifoxonaga olib ketilayotgan vaqtida yo‘lda vafot etgan.
Ushbu holat bo‘yicha Pop tuman IIB huzuridagi TB tomonidan 2021-yil 17-sentabr kuni Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bilan jinoyat ishi qo‘zg‘atilgan.
Bundan avval Toshkent—O‘sh yo‘lida ikki Isuzu yuk mashinasi to‘qnashib, ulardan biri ag‘darilib ketgani haqida xabar berilgan edi.
Izoh (0)