Zo‘ravonmi yoki jabrdiyda? Taqdir zarbalaridan qochib qutulolmagan pop qiroli — Maykl Jeksonning fojiali taqdiri

Millionlab muxlislar qalbidan joy olgan, ammo mashhurlik va muvaffaqiyatlari shaxsiy hayotidagi muammolarni yengib o‘tishga yordam bermagan xonanda Maykl Jeksonning hayoti haqida ma’lumot berib o‘tamiz.

Qiyin kechgan bolalik

Bo‘lajak yulduz Indiana shtatidagi uncha katta bo‘lmagan shaharcha — Gerida dunyoga kelgan. Bolakayning musiqaga shaydo bo‘lgan ota-onasi Jozef va Ketrin Jeksonlar ushbu sevgini 9 nafar farzandining qalbiga jo qilishga uringan. Shu bilan birga oila boshlig‘i, ya’ni ota haddan ortiq qattiqqo‘l bo‘lgan, bolalari uning chizgan chizig‘idan chiqmagan. Keyinroq Mayklning to‘ng‘ich akalaridan biri otasi ularga muntazam ravishda qo‘l ko‘targani, surunkali ravishda tahqirlaganini ma’lum qilgan. Onasi esa qo‘llab-quvvatlash o‘rniga bolalarini tashrif buyurishdan bosh tortish imkonsiz bo‘lgan diniy sekta yig‘ilishlariga yetaklab borgan.

The Jackson 5 guruhi va karyeraning boshlanishi

1964-yilda The Jackson 5 guruhiga asos solingan. Undan Jeksonlar oilasining katta farzandlari o‘rin olgan. Tito, Jeremi va Jeki vokal ijrochi bo‘lgan, kenja farzandlar Maykl va Marlon esa musiqiy cholg‘u chalgan. Keyinroq iste’dodi payqalgach, kichik Maykl guruhda bek-vokalchi bo‘lib faoliyat yuritgan. Bo‘lajak yulduz 1972-yilda yakkaxon xonanda sifatida karyera boshlagan.

1980-yillarga kelib uning ijrosidagi qo‘shiqlar deyarli barcha yerda yangray boshlagan. 1982-yilda taqdim qilingan va bir necha o‘n yil davomida eng ko‘p sotilgan albom sifatida e’tirof etilgan Thriller ulkan muvaffaqiyatga erishishiga sabab bo‘lgan.

Shaxsiy hayot

Maykl ikki marta turmush qurgan. Ilk marta u Elvis Preslining qizi Liza Mariyaga oila qurishni taklif qilgan. 1994-yilda yashirincha turmush qurgan juftlik 2 yil o‘tib ajrashishgan. Ayriliqdan keyin qayta oila qurishga qaror qilgan Jekson bu safar rafiqa sifatida dermatolog-shifokorining assistenti Debbi Rouni tanlagan.

View this post on Instagram

Ushbu turmushi davomida ikki nafar farzand — Prins Maykl Jozef Jekson, Peris-Maykl Ketrin Jekson dunyoga kelgan. Ammo bu turmush ham vaqt sinovidan o‘tmagan, Debbi va Maykl munosabatlariga nuqta qo‘yishni afzal bilgan. 2002-yilda pop qiroli surrogat ona yordamida uchinchi marta otalik baxtini his qilgan — farzandi Prins Maykl Jozef Jekson II tug‘ilgan.

“Neverlend”ni tark etib

Qo‘shiqchi 1980-yil oxirida avlodini davom ettiruvchi farzandlar dunyoga kelishini orzu qilib yurgan chog‘lari Santa-Barbara yaqinida qo‘rg‘on qurdirgan va uning atrofini attraksionli bog‘ga aylantirgan. Ranchoga Maykl tomonidan “Neverlend” deb nom berilgan va keyinchalik xonanda haqida tarqalgan salbiy ma’lumotlarning aksariyati ushbu joy bilan bog‘liq bo‘lgan. 1993-yilda Jekson uyida mehmon bo‘lgan 13 yashar bolaga nisbatan zo‘ravonlik qilishda ayblangan. Keyinroq ushbu holat boshqa bir bola bilan ham takrorlangan. Dalil-isbotlar topilmagan, ammo tarqab ulgurgan mish-mishlar ijodkor karyerasi va salomatligiga ta’sir qilgan. 2019-yil vafotidan 10 yil vaqt o‘tib, “Neverlendni tark etib” nomli film ekran yuzini ko‘rgan. Unda xonanda bilan bog‘liq o‘sha ehtimoliy zo‘ravonlik mavzusi qayta tilga olingan.

Pop qirolning kasalligi va o‘limi

Haddan ortiq darajada mashhur ekaniga qaramay, Mayklni baxtli yashagan deb aytib bo‘lmaydi. Shaxsiy hayotidagi muammo va bir qancha ayblovlardan tashqari, xonanda yuzining deformatsiyasiga olib kelgan vitiligo (terining pigmentatsiyasi buzilishi) hamda volchanka kasalligidan aziyat chekkan. Omadsiz jarrorlik amaliyotlari vaziyatni yanada og‘irlashtirgan.

2009-yil 25-iyun kuni muxlislar kutilmagan xabardan larzaga kelgan — pop qiroli davolovchi shifokorining ko‘rsatmasiga binoan qabul qilgan dori vositasi dozasini oshirib yuborgani oqibatida hayotdan ko‘z yumgan. Dozani hisoblamagani sabab tibbiyot xodimi 4 yilga ozodlikdan mahrum bo‘lgan. Maykl Jeksonning qizi uning dafn marosimida: “U faqatgina orzu qilish mumkin bo‘lgan eng yaxshi ota edi”, degan.