AQSh Moliya vazirligi 17-sentabr kuni Eron, Livan va Kuvaytning bir qator fuqarolariga qarshi sanksiyalar kiritilganini e’lon qildi. Sanksiyalar ushbu shaxslarning Livan “Hizbulloh” harakati va Eron Islom inqilobi gvardiyasi korpusi (IRGC)ga aloqadorligi uchun joriy etilgan.
Foto: Yandex
Livanning ikki fuqarosi, Kuvaytning to‘rt fuqarosi va Eronning olti fuqarosiga nisbatan AQSh sanksiyalar joriy etildi. Vazirlik bayonotida aytilishicha, mazkur shaxslar IRGC va “Hizbulloh”ni mablag‘ bilan ta’minlaydigan soxta kompaniyalar tarmog‘ining a’zolari.
“Bu tarmoqlar birgalikda mintaqaviy moliyaviy tizimlar orqali o‘n millionlab dollarlarni yuvib, ‘Hizbulloh’ va IRGC manfaatlari yo‘lida valyuta operatsiyalari, oltin va elektronika savdosini amalga oshirgan”, — deyiladi xabarda.
Bayonotda ta’kidlanishicha, “Hizbulloh” IRGC ko‘magida ushbu tarmoqlar orqali olingan daromadlarni “terrorchilik faoliyatini moliyalashtirish, shuningdek Livanda va butun mintaqada beqarorlikni saqlash uchun” ishlatmoqda.
Avvalroq AQSh Belarusga qarshi yangi sanksiyalar joriy qilgandi. AQSh Belarusning 23 nafar jismoniy hamda 21 ta yuridik shaxsi, ya’ni mudofaa va energetika sohasi kompaniyalari, ishlab chiqarish sektori korxonalari hamda mamlakat Milliy olimpiya qo‘mitasiga nisbatan cheklovlar o‘rnatdi.
