Andijon shahrining Boburshoh ko‘chasida Labo avtomobili yo‘lning belgilanmagan qismidan kesib o‘tayotgan piyodani urib yubordi. Natijada piyoda og‘ir tan jarohati olib, shifoxonada vafot etdi, deya xabar bermoqda “Daryo” muxbiri.
Qayd etilishicha, 2021-yilning 9-sentabr kuni soat 11:00 da Xo‘jaobod tumanida yashovchi fuqaro U.X. Andijon shahrining Boburshoh ko‘chasida joylashgan “Lemon” qo‘shma korxonasi qarshisida Labo avtomobilini boshqarib ketayotib, yo‘lning belgilanmagan joyidan o‘tayotgan 38 yoshli ayolni urib yuborgan. Oqibatda piyoda tan jarohatlari olib, Respublika shoshilinch tibbiy yordam ilmiy markazi viloyat filialiga bosh miya yopiq shikasti tashxisi bilan yotqizilgan. Biroq ko‘rsatilgan tibbiy muolajalarga qaramasdan shifoxonada vafot etgan.
Voqea joyi o‘rganilganda yo‘lga yotiq chiziqlari chizilgani, yo‘l belgilari mavjudligi, kunning yorug‘ vaqti, yo‘lning qatnov qismida nuqsonlar mavjud emasligi aniqlangan. Piyoda 20 metr atrofida yaqin oraliq masofada piyodalar o‘tish joyi mavjud bo‘lsa-da, yo‘lning qatnov qismini belgilanmagan joyidan kesib o‘tayotgan vaqtida avtomobil haydovchisi uni ko‘rmasdan urib yuborgan.
Holat yuzasidan Andijon shahar IIB huzuridagi tergov bo‘limi tomonidan tergovga qadar surishtiruv ishlari olib borilmoqda.
Eslatib o‘tamiz, avvalroq Toshkent viloyatida Matiz’ni mast holda boshqargan Milliy gvardiya xodimi sabab 14 yoshli bola YTH qurboni bo‘lgani aytilgani, ammo keyinchalik haydovchi Milliy gvardiya xodimi ekani rad etilgani xabar berilgandi.
Mavzuga doir:
