2001-yilning 11-sentabr kuni AQShdagi terrorchilik harakatlari oqibatida 3000 ga yaqin inson hayotdan ko‘z yumgan. Keyinroq esa taqdir tuhfasi bilan ushbu fojiadan qutilib qolgan kishilar hikoyalari e’lon qilina boshladi. Kimningdir uxlab qolgani, kechikkani boshqalarning esa reysni o‘tkazib yuborgani tirik qolishiga sabab bo‘lgan. Ayrim mashhurlar ham bunday omadli kishilar qatorida bo‘lgan.

Ian Torp — uyida fotoapparatini unutib qoldirgan

Foto: “Domashniy ochag”

11-sentabr kuni tongda avstraliyalik suzish bo‘yicha olimpiya chempioni yugurishga chiqqan. U Nyu-Yorkdagi egizak minoraga qadar yugurib borishni hamda Jahon savdo markazining 102-qavatida joylashgan tomosha maydonidan Manxettenni suratga olishni rejalashtirgan. Fotoapparati mehmonxonada qolib ketganini eslagan sportchi taksi to‘xtatib ortiga qaytgan. Xayoli joyida emasligi Ianning tirik qolishiga sabab bo‘lgan. Suzuvchi mehmonxonaga yetib borganida samolyot binoning biriga borib urilgan.

Maykl Jekson – uxlab qolgani tufayli minoradagi uchrashuvga kechikkan

Foto: “Domashniy ochag”

​2001-yilning 11-sentabr kuni egizak minoralardan birining yuqori qavatida Maykl Jekson bilan uchrashuv belgilangan. Ammo xonanda uxlab qolgani uchun uni o‘tkazib yuborgan. Onasi Ketrin va singlisi Rebbi bilan kechgacha gaplashib chiqqani tufayli ertasi kuni o‘z vaqtida turishga qiynalgan. Keyinroq “Sen yolg‘iz emassan: Maykl, akamning ko‘zi bilan” (You Are Not Alone: Michael, Through My Brother’s Eyes) nomli biografiyasida Jermeyn Jekson quyidagicha yozib qoldirgan: “Yaxshi hamki, Mayklning ertasi kuni tongda Jahon savdo markazidagi uchrashuvga borishi hech kimning xayoliga kelmagan. Yuz bergan hodisa haqida xabar topganimizdan keyin onam Maykl bilan hammasi yaxshi ekaniga amin bo‘lish uchun mehmonxonaga qo‘ng‘iroq qilgan”. Xonandaning o‘zi esa onasi uning oldida uzoq vaqt bo‘lgani uchun ham hammasi yaxshi ekanini ta’kidlab, buning uchun unga minnatdorlik bildirgan.

Sara Fergyusson – mashinalar tirbandligida qolib ketgan

Foto: “Domashniy ochag”

Gersoginya Sara 11-sentabr kuni tongda shimoliy minoraning 101-qavatidagi Chances for children fondi tomonidan tashkil qilingan xayriya tadbirida ishtirok etishi kerak bo‘lgan. NBC kanalidagi Today dasturida intervyu berib chiqqanidan keyin baxtli tasodif bilan mashinalar tirbandligida qolib ketgan. Oqibatda 20 daqiqaga kech qolgan ayol manzilga yetib borganida hamma narsa yonib kulga aylanganiga guvoh bo‘lgan. Gersoginya hali hamon u daqiqalarni yaxshi xotirlaydi. “Hayotimdagi har bir daqiqani falakning marhamati deb qabul qilaman”, — degan gersoginya Hello jurnaliga bergan intervyusida.

Rob Lou – terrorchilar bilan bir reysda uchgan

Foto: “Domashniy ochag”

Fojiadan bir necha kun avval American Airlines aviakompaniyasining AAL 11 reysida uchgan Gollivud aktyori Rob Lou bortda bir necha kundan keyin avialaynerni shimoliy binoga burib yuboradigan terrorchilar borligini xayoliga ham keltirmagan. “Al-Qoida” vakillari 11-sentabr voqealaridan avvalroq harakatlarni hisob-kitob qilish uchun sinov reysini amalga oshirgan. U shubha tug‘diradigan nimanidir payqaganida, fojianing oldini olishi mumkin edi, ammo o‘sha kuni hech nima va hech narsa e’tiborini jalb qilmagan.

Gvinet Peltrou – begona ayolni o‘limdan saqlab qolgan

Foto: “Domashniy ochag”

11-sentabr kuni yoga mashg‘ulotidan uyga qaytayotgan Gvinetning mashinasi qarshisidan to‘satdan bir ayol chiqib qolgan. Ishga shoshganidan yugurib ketayotgan Lara aktrisani ko‘rib, yo‘lidan to‘xtagan hamda undan dastxat so‘ragan. Oqibatda janubiy binoning 77-qavatida joylashgan ishiga kech qolgan. Ushbu tasodifiy uchrashuv uning tirik qolishiga hissa qo‘shgan. 10 yildan keyin Lara Gvinetga minnatdorchilik bildirib maktub yuborgan. Agar o‘shanda aktrisa yo‘lidan chiqmasa va u bilan suhbatlashmasa, vafot etgan kishilar qatorida bo‘lgan bo‘lardi.

Mark Uolberg — so‘nggi daqiqada samolyot (terrorchilar bor bo‘lgan)ga chiqish fikridan qaytgan

Foto: “Domashniy ochag”

Aktyor 2001-yil 11-sentabrda o‘sha shimoliy binoga borib urilgan samolyot — American Airlines aviakompaniyasining AAL 11 reysi uchun chipta sotib olgan bo‘lgan. Nima ham bo‘lgan-u Uolberg rejalarini o‘zgartirib, Torontodagi kinofestivalga borishga qaror qilgan. “Agar bolalar bilan samolyotda bo‘lganimda, hammasi boshqacha bo‘lgan bo‘lardi. Birinchi klassda ko‘p qon oqqan bo‘lardi va men “Qani hammamiz xavfsiz joyga o‘tirib olamiz, degan bo‘lardim”, — degan Uolberg Men’s Journal jurnaliga bergan intervyusida. Ammo keyinroq birinchi klassdagi yo‘lovchilarga nisbatan nohaq munosabatda bo‘lganini anglab yetgan aktyor aytgan gaplari uchun uzr so‘ragan. “Halok bo‘lganlarning oilasidan uzr so‘rayman. Xohlamagan holda qo‘pol fikr bildirdim”, — degan u.

Set Maffarleyn – reysga kech qolgan

Foto: “Domashniy ochag”

Yozuvchi va komikslar muallifi ham Mark Uolberg terrorchilar bilan bir reysda uchishi kerak bo‘lgan. Ammo ichkilikdan keyingi bosh og‘rig‘i sabab reysga kech qolgan. 10 daqiqa erta kelganida u ham samolyot va binodagi kishilar qatorida vafot etgan bo‘lardi.